Semei qalasyndaǵy №35 jalpy bilim beretin mektepte zamanaýi úlgidegi «Abai kitaphanasy» ashyldy. Jańa kitaphana oblys ákimi Berik Ýálidiń úndeýine sáikes «Almatykitap» baspasynyń quryltaishysy ári prezidenti Gaýhar Aitjanqyzynyń qoldaýymen júzege asty, dep habarlaidy Dalanews.kz.
Kitaphana 6,5 million teńgege tolyq jabdyqtalyp, oqýshylar úshin barlyq jaǵdai jasaldy. Munda 60 myń kitap qory jinaqtalǵan. Onyń 30 myńy – kórkem ádebiet, al qalǵany – 1–11 synypqa arnalǵan qazaq jáne orys tilindegi oqýlyqtar. Jańa keńistikte arnaiy qoima, yńǵaily oqý aimaqtary jáne interaktivti taqta ornatylǵan.
Ashylý rásimine Abai oblysy bilim basqarmasynyń basshysy Baýyrjan Erdembekov qatysty.
«Abaidyń sózi – máńgilik, murasy – sarqylmas qazyna. Árbir kitap jas urpaqtyń oi-órisin keńeitip qana qoimai, eldik rýhty kúsheitýge qyzmet etedi. Oqýshylar bul jerde oqýlyq qana emes, úlken ómirge jol kórsetetin Abaidyń danalyǵyn da tabýy tiis. Biyl Memleket basshysy halyqqa Joldaýynda metsenattyqtyń qoǵam úshin mańyzyn atap ótti. Osyndai igilikti isti júzege asyryp otyrǵan «Almatykitap» baspasynyń qoldaýy – sonyń naqty kórinisi», – dedi basqarma basshysy.
Sharaǵa mekteptiń oqýshylary qatysyp, Abai shyǵarmalarynan úzindiler oqydy.
Eske salaiyq, Semeidegi №35 mektep 1961 jyly salynǵan. Munda 132 pedagog qyzmet atqarady, 1400-ge jýyq oqýshy bilim alady. Mektepte «Abai klýby» jáne ájelerden quralǵan «Zere» klýby jumys isteidi.
