Abai oblysynda Abaidyń 180 jyldyǵyna arnalǵan onkúndik mereitoilyq sharalar legi jalǵasýda. Onkúndiktiń altynshy kúninde Semei qalasynda kórý qabileti shekteýli azamattarǵa arnalǵan arnaiy kitaphananyń jańa ǵimaraty paidalanýǵa berildi. Nysannyń ashylý saltanatyna oblys ákimi Berik Ýáli, «Samuryq-Qazyna» AQ basqarýshy direktory Ǵibrat Aýǵanov qatysty,- dep habarlaidy Dalanews.kz
Jylyna 15 myńnan astam kelýshini qabyldaityn jańa inkliýzivti kitaphanany «Samuryq-Qazyna» qorynyń Abaidyń 180 jyldyǵyna Abai oblysynyń turǵyndaryna jasaǵan erekshe syilyǵy deýge bolady. Joba Samruk-Kazyna Trust korporativtik qaiyrymdylyq qorynyń qoldaýymen 410 million teńgege qarjylandyryldy. Bul – mádeni-áleýmettik mekeme elimizdegi óńirlik deńgeidegi eń iri jáne zamanaýi inkliýzivti keńistik.
Eki qabatty ǵimarattyń jalpy aýdany – 852 sharshy metr. Nysan zaǵip jáne nashar kóretin jandardyń qajettilikterine beiimdelgen. Tiflotehnologiia kabineti, brail júiesimen oqý-jazý bólmesi, dybystyq ádebietter qory, kovorking pen oqý zaldary, bibliografiialyq aqparattar bólimi, ádebietterdi óńdeý jáne tolyqtyrý bólimi ornalasqan. Erekshe azamattardyń esh kedergisiz erkin kirip-shyǵýy úshin arnaiy tutqalarmen jabdyqtalǵan jáne bilim alýyna barlyq jaǵdai jasalǵan. Keleshekte kitaphana bazasy elektrondy katalogqa kóshiriledi. Kitaphananyń kitap qory 40 myń dana kitaptan turady.
Semei qalasy ákimdigi ǵimarat mańaiyn tolyq abattandyryp, shyrsha otyrǵyzyp, kireberis joldarǵa asfalt tósedi. Kitap qory tolyq kóshirilip, kabinetter men sóreler retke keltirildi.
Aimaq basshysy bul nysannyń mańyzy zor ekenin atap ótip, ǵimaratty salǵan «Samuryq-Qazyna» qoryna alǵysyn jetkizdi.
«Memleket basshysy Qasym-Jomart Kemeluly Toqaev «Abai qazaqtyń damylsyz oqyp-úirengenin bar jan-tánimen qalady. «Ǵylym tappai maqtanba» dep, bilimdi igermeiinshe, biikterdiń baǵyna qoimaitynyn aitty. Ol «Biz ǵylymdy satyp mal izdemek emespiz», – dep tujyrymdap, kerisinshe, el dáýletti bolýy úshin ǵylymdy igerý kerektigine nazar aýdardy. Uly Abaidyń «Paida oilama, ar oila, Talap qyl artyq bilýge» degen ónegeli ósietin de osy turǵydan uǵynýymyz qajet» dep atap ótken bolatyn.
Bul jańa kitaphana – erekshe qajettilikteri bar azamattardyń bilimge qulshynysy men izdenisterine tiisti jaǵdai jasaýda airyqsha mańyzǵa ie. Olardyń bilim alý, shyǵarmashylyqpen ainalysý, mádeni jáne rýhani damý múmkindikterin keńeitýde erekshe ról atqarary sózsiz. Kitaphana zamanaýi standarttarǵa sai jabdyqtalǵan. Munda Brail qarpindegi ádebietter, dybystyq kitaptar, arnaiy tehnikalyq qurylǵylar men sandyq resýrstar keńinen qoljetimdi. Kitaphanada 41 000-nan astam kitap qory bar. Munyń barlyǵy inkliýzivti qoǵam qurý jolyndaǵy naqty ári mańyzdy qadam bolyp sanalady», – dedi oblys ákimi.
«Samuryq-Qazyna» qory sońǵy bes jylda Abai oblysynda bilim, sport jáne áleýmettik osal toptardy qoldaý baǵytynda jalpy quny 2,5 mlrd teńgeni quraityn 14 jobany júzege asyrdy.
"Qazirgi tańda oblys ákimdigimen birlesip Semeidiń Ushaqtar shaǵyn aýdanynda sport saraiynyń qurylysy josparlanýda. Munda 4 myńǵa jýyq adam sportpen shuǵyldana alady. Bul – qor tobynyń aimaqtyq infraqurylymdy damytý jáne áleýmettik qoldaýdy keńeitýge baǵyttalǵan bastamalarynyń biri», - dedi «Samuryq-Qazyna» AQ basqarýshy direktory Ǵibrat Aýǵanov.
