Aimaq basshysy Berik Ýálidiń tapsyrmasymen Abai oblysy ákimdiginiń janynan jumys toby qurylyp, úleskerlerdi qoldaý ortalyǵy ashyldy, dep habarlaidy Dalanews.kz
Quramyna quqyq qorǵaý organdarynyń ókilderi kirgen jumys toby óńirde zań buzýshylyqpen salynyp, sonymen birge azamattardyń qarjylaryn turǵyn úi qurylysyna zańsyz tartqan qurylys kompaniialary boiynsha óz usynystaryn aitatyn bolady.
Semei qalasyndaǵy Selevin kóshesi 12 b mekenjaiynda ornalasqan ortalyq úleskerlerge zańdyq turǵydan kómek kórsetedi. Bul týraly Abai oblysy boiynsha memlekettik sáýlet-qurylys baqylaý basqarmasy basshysynyń mindetin atqarýshy Sailaý Bainazarov málimdedi.
«Munda úleskerler ózderiniń kelisimsharttaryn ákelip, tirkeýge bolady. Ol tirkeý ne úshin kerek? Árbir úleskerdiń máselesin jeke-jeke qarastyrý úshin qajet. Eger bizdiń qolymyzda kelisimsharttardyń qujattary bolmasa, azamattardyń turǵyn úige qarjysyn salǵan-salmaǵanyn dáleldeitin fiskaldy túbirtekteri bolmasa qalai qarastyramyz? Turǵyndar kelisimsharttaryn ortalyqqa tirkegen kezde zańdy turǵyda qarai alamyz», - dedi basqarma ókili.
Basqarmanyń málimetinshe, 2022-2024 jyldary Semei qalasynda ondaǵan kóp qabatty úi ruqsatsyz salynǵan. Bul turǵyn úilerge qazirgi kezde 547 úleskerdiń óz qarjylaryn salǵany anyqtaldy.
Sailaý Bainazarovtyń aitýynsha, úleskerlerdiń eshqaisysy nazardan tys qalmaidy. Bul máseleni oblys ákimi jeke baqylaýynda ustap otyr. Ákimdik pen basqarma ókilderi úleskerlermen jeke-jeke jumys júrgizip, ashyq dialog qurýǵa daiyn.
