Semeide jańa órt sóndirý deposy paidalanýǵa berildi. Saltanatty sharaǵa oblys ákimi Berik Ýáli, Qazaqstan Respýblikasynyń Tótenshe jaǵdailar ministri Shyńǵys Árinov jáne tótenshe jaǵdailar departamentiniń qyzmetkerleri, sala ardagerleri qatysty,- dep habarlaidy Dalanews.kz.
Órt sóndirý deposynda 6 arnaiy tehnikaǵa oryn qarastyrylǵan. Nysannyń jalpy aýdany – 0,82 gektar. Qurylys «Demeý Qazaqstan qory» korporativtik qory esebinen qarjylandyryldy.
Jańa órt sóndirý deposy qaladaǵy azamattyq qorǵaý salasynyń infraqurylymyn nyǵaitýǵa baǵyttalǵan mańyzdy nysan. Ǵimarattyń janynda qyzmetkerlerdiń sportpen shuǵyldanýyna múmkindik beretin fitnes-zaly bar. 11 bólmeden turatyn eki qabatty apartamentte órt sóndirýshi mamandarǵa qajetti barlyq turmystyq jáne qosalqy jailar qarastyrylǵan.
Aimaq basshysy órt sóndirý deposynyń ashylýy óńir halqynyń qaýipsizdigin qamtamasyz etýde mańyzdy nysan ekenin atap ótti.
«Memleket basshysy Qasym-Jomart Toqaev «Sizderdiń jumystaryńyz qaýip-qaterge toly ári zor jaýapkershilikti talap etedi. Memleket pen qoǵam sizderdiń antqa adaldyqtaryńyzdy, qajyrly eńbekterińizdi joǵary baǵalaidy» dep atap ótken bolatyn. Sondyqtan Abai oblysynda azamattyq qorǵaý júiesin damytýǵa erekshe kóńil bólinip keledi. Tótenshe jaǵdailar departamentiniń materialdyq-tehnikalyq bazasyn nyǵaitýǵa oblystyq biýdjetten 1 mlrd. 300 mln. teńgeden astam qarjy bólindi. Sonyń nátijesinde 200-den astam zamanaýi tehnika satyp alyndy. Órt sóndirýshi men qutqarýshy – kez kelgen sátte óz ómirin qaterge tigip, adam ómiri úshin kúresetin mártebeli mamandyq ieleri. Sizderdiń eńbekterińizdi memleket pen qoǵam árqashan joǵary baǵalaidy. Búgin ashylyp otyrǵan jańa bólim – sizderdiń qyzmetterińizdi jeńildetip qana qoimai, tótenshe jaǵdailardyń aldyn alýda tiimdi jumys isteýge múmkindik týǵyzady dep oilaimyn. Jańa nysan eldiń tynyshtyǵyna qyzmet etip, qutqarýshylarymyzdyń jumysyna serpin bersin», - dedi oblys ákimi.
Tótenshe jaǵdailar ministri Shyńǵys Árinov jańa ǵimarat Semei óńiriniń azamattyq qorǵaý salasy boiynsha 30 jyldaǵy alǵashqy qurylys ekenin aitty.
«Munda qutqarýshylarǵa barlyq jaǵdai eskerilgen, bizdiń talaptarǵa tolyq sai keledi. Endi osy qurylystyń ekinshi kezeńinde qyzmettik baspana salatyn oiymyz bar. Birte-birte bizdiń barlyq bólimshelerimiz kem degende osyndai deńgeige jetkenin jón kóremin. Sondyqtan bundai is sharalar jalǵasyn tabatynyna senimim zor. Osy múmkindikti paidalana otyryp, respýblikalyq «Demeý» qoryna, oblys ákimi Berik Ýáliulyna, ákimdik qyzmetkerlerine, merdigerderge, demeýshilerge jáne barsha atsalysqan azamattarǵa shynaiy alǵysymdy aitqym keledi», - dedi ol.
Shara barysynda óńirdegi órt sóndirý bólimderine ótimdiligi joǵary KamAZ ben Abai jáne Jańasemei aýdandarynyń Arhat jáne Qainar aýyldaryna órt sóndirý tehnikalary tabystaldy.
Eske salaiyq, Abai oblysynda 70 órt sóndirý beketi jumys isteidi. Onyń 11-i jyl boiy turaqty rejimde qyzmet etedi. Biyl «Aýyl qutqarýshylary» baǵdarlamasy aiasynda Besqaraǵai aýdanynda jáne Maqanshy aýdanyndaǵy Alakól demalys aimaǵynda jańa órt sóndirý beketteri ashyldy. Jyl sońyna deiin osyndai birneshe nysandy iske qosý josparlanyp otyr.
