Búgin Semei qalasynda «Memleket – biznes – úkimettik emes uiym – tiimdi ózara árekettesý jáne seriktestik» taqyrybynda óńirlik azamattyq forým ótti,- dep habarlaidy Dalanews.kz
Sharaǵa oblys ákimi Berik Ýáli, Parlament Senatynyń depýtaty Bibigúl Jeksenbai, Mádeniet jáne aqparat ministrliginiń Azamattyq qoǵam isteri komiteti tóraǵasynyń orynbasary Eldar Saparov, «Qazaqstan Respýblikasynyń Azamattyq Aliansy» zańdy tulǵalar birlestiginiń prezidenti Baný Nurǵazieva, ózge óńirlerden kelgen delegatsiialar, memlekettik organdardyń, saiasi partiialar men qoǵamdyq uiymdardyń ókilderi qatysty. Forýmnyń ashylýynda sóz sóilegen aimaq basshysy alqaly jiynnyń memleket, biznes jáne azamattyq qoǵam arasyndaǵy syndarly dialogtyń, ózara túsinistik pen seriktestiktiń mańyzdy alańy ekenin atap ótti.
«Ózderińizge belgili, biyl bizdiń óńirimiz Memleket basshysy Qasym-Jomart Kemeluly Toqaevtyń tapsyrmasyna sáikes uly oishyl, ulttyń rýhani tuǵyry – Abai Qunanbaiulynyń 180 jyldyq mereitoiyn laiyqty deńgeide, keń kólemde atap ótti. Elimizdiń túkpir-túkpirinen 50 myńnan astam qonaqtar keldi. Bul aitýly mereitoidy joǵary deńgeide uiymdastyrýda memlekettik qurylymdarmen qatar biznes qaýymdastyǵy men qoǵamdyq uiymdardyń belsendi airyqsha qoldaýyn sezindik. Prezident atap ótkendei, elimizdiń damýy úshin sanaly azamattyq belsendilikti arttyryp, memleket pen qoǵam arasyndaǵy senimdi seriktestikti nyǵaitý qajet. Memleket – biznes – Úkimettik emes uiymdar arasyndaǵy seriktestik tek áleýmettik máselelerdi sheshýdiń quraly ǵana emes, ol qoǵamdyq turaqtylyqtyń, yntymaq pen ózara senimniń negizi. Sondyqtan biz árqashan ashyq dialogqa, ortaq maqsatqa jumylýǵa daiynbyz. Aldaǵy ýaqytta birlesken bastamalarymyz artyp, óńirimizdiń órkendeýine, halyqtyń ál-aýqatyn jaqsartýǵa birge úles qosatyndaryńyzǵa senemiz. Forým jumysyna sáttilik tileimin» dedi oblys ákimi.
Forýmda qatysýshylar memleket – biznes – úkimettik emes uiymdar arasyndaǵy yntymaqtastyqty jetildirý máselelerin talqylady. Sonymen qatar azamattyq qoǵam institýttarynyń damýyndaǵy ózekti máselelerge nazar aýdardy.
Qazir oblys aýmaǵynda 300-den astam qoǵamdyq uiym belsendi jumys isteidi. 2023 jyldan beri «Azamattyq bastamalardy qoldaý ortalyǵy» ashylyp, kóptegen jobalar iske asyryldy. Forým aiasynda qoǵam ómiriniń túrli salalarynda belsendilik tanytyp júrgen úkimettik emes uiymdar ókilderi «Quqyq qorǵaý salasyndaǵy úzdik úkimettik emes uiym», «Volonterlik qyzmet salasyndaǵy úzdik úkimettik emes uiym», «Zertteý qyzmeti salasyndaǵy úzdik úkimettik emes uiym», «Shyǵarmashylyq qyzmet salasyndaǵy úzdik úkimettik emes uiym», «Jastar saiasaty salasyndaǵy úzdik úkimettik emes uiym», «Jumysshylardyń quqyqtaryn qorǵaý salasyndaǵy úzdik úkimettik emes uiym», «Densaýlyq saqtaý salasyndaǵy úzdik úkimettik emes uiym», «Aýyldyq úzdik úkimettik emes uiym» nominatsiialary boiynsha marapattaldy.
