Semeide oblystyq kópsalaly aýrýhana salynady. Búgin meditsinalyq nysannyń irgetasyn qalaý rásimi ótti. Sharaǵa oblys ákimi Berik Ýáli jáne osy salanyń ardagerleri, dárigerler qatysty, dep habarlaidy Dalanews.kz
Prezidenttiń tapsyrmasyna sáikes boi kóteretin ǵimarat Abai oblysyn damytýdyń keshendi josparyna engen. 300 tósek-oryndyq jańa kópsalaly aýrýhanada bir aýysymda 250 adamdy qabyldaityn keńes berý jáne tekserý bólimi jumys isteitin bolady.
Aimaq basshysy bul meditsinalyq nysannyń óńir turǵyndary úshin mańyzy zor ekenin atap ótti.
«Abai oblysy – erteden dárigerlik dástúri qalyptasqan kieli óńir. Aimaǵymyzdan shyqqan bilikti mamandar qazaq meditsinasynyń negizin qalady. Alaida, sońǵy shirek ǵasyrda bul sala nazardan tys qalyp, bilikti mamandardyń basqa óńirlerge qonys aýdarǵanyn da jasyra almaimyz. Sondyqtan bul aýrýhananyń irgetasyn qalaý – sol úzilgen dástúrdi qaita jalǵaýdyń nyshany. Merdiger kompaniia ókilderi atap ótkendei, aýrýhana zamanaýi meditsinalyq tehnologiialarmen jabdyqtalatyn bolady. Barlyqtaryńyzdy osy sátpen shyn júrekten quttyqtaimyn. Biz bul kúndi asyǵa kúttik. Óitkeni, oblysymyzda osy ýaqytqa deiin osyndai aýrýhana bolǵan emes. Endi mine sol olqylyqtyń orny toldy. Óńir turǵyndary atynan Memleket basshysyna alǵys bildiremiz», - dedi oblys ákimi.
Abai oblysynda búginde 31 statsionarlyq meditsinalyq uiym jumys isteidi, onyń ishinde 20-sy memlekettik, 11-i jekemenshik. Oblys boiynsha ár 10 myń turǵynǵa nebári 59 tósek-orynnan keledi. Bul – respýblika boiynsha eń tómengi kórsetkishterdiń biri.
Oblystyq mamandandyrylǵan meditsinalyq qyzmettiń 70 paiyzy Semei qalasynda shoǵyrlanǵan. Qazirgi statsionarlardyń basym bóligi eski, materialdyq-tehnikalyq bazasy tozǵan. Jedel meditsinalyq járdem aýrýhanasy 300 tósekke shaqtalǵanymen is júzinde 375 naýqasty qabyldap otyr. Kardiologiia, insýlt, ginekologiia, toksikologiia, nevrologiia, travmatologiia bólimderinde tósek-oryn tapshy. Jańa aýrýhana osy tapshylyqty joiyp, zamanaýi talaptarǵa sai meditsinalyq kómek kórsetýdi qamtamasyz etedi. Sonymen qatar, aýyl turǵyndary úshin qashyqtan keńes beretin telemeditsina ortalyǵy qurylady. Meditsinalyq nysan 2027 jyly paidalanýǵa berilmek.
