سەمەيدە وبلىستىق كوپسالالى اۋرۋحانا سالىنادى. بۇگىن مەديسينالىق نىساننىڭ ىرگەتاسىن قالاۋ ءراسىمى ءوتتى. شاراعا وبلىس اكىمى بەرىك ءۋالي جانە وسى سالانىڭ ارداگەرلەرى، دارىگەرلەر قاتىستى، دەپ حابارلايدى Dalanews.kz
پرەزيدەنتتىڭ تاپسىرماسىنا سايكەس بوي كوتەرەتىن عيمارات اباي وبلىسىن دامىتۋدىڭ كەشەندى جوسپارىنا ەنگەن. 300 توسەك-ورىندىق جاڭا كوپسالالى اۋرۋحانادا ءبىر اۋىسىمدا 250 ادامدى قابىلدايتىن كەڭەس بەرۋ جانە تەكسەرۋ ءبولىمى جۇمىس ىستەيتىن بولادى.
ايماق باسشىسى بۇل مەديسينالىق نىساننىڭ ءوڭىر تۇرعىندارى ءۇشىن ماڭىزى زور ەكەنىن اتاپ ءوتتى.
«اباي وبلىسى – ەرتەدەن دارىگەرلىك ءداستۇرى قالىپتاسقان كيەلى ءوڭىر. ايماعىمىزدان شىققان بىلىكتى ماماندار قازاق مەديسيناسىنىڭ نەگىزىن قالادى. الايدا، سوڭعى شيرەك عاسىردا بۇل سالا نازاردان تىس قالىپ، بىلىكتى مامانداردىڭ باسقا وڭىرلەرگە قونىس اۋدارعانىن دا جاسىرا المايمىز. سوندىقتان بۇل اۋرۋحانانىڭ ىرگەتاسىن قالاۋ – سول ۇزىلگەن ءداستۇردى قايتا جالعاۋدىڭ نىشانى. مەردىگەر كومپانيا وكىلدەرى اتاپ وتكەندەي، اۋرۋحانا زاماناۋي مەديسينالىق تەحنولوگيالارمەن جابدىقتالاتىن بولادى. بارلىقتارىڭىزدى وسى ساتپەن شىن جۇرەكتەن قۇتتىقتايمىن. ءبىز بۇل كۇندى اسىعا كۇتتىك. ويتكەنى، وبلىسىمىزدا وسى ۋاقىتقا دەيىن وسىنداي اۋرۋحانا بولعان ەمەس. ەندى مىنە سول ولقىلىقتىڭ ورنى تولدى. ءوڭىر تۇرعىندارى اتىنان مەملەكەت باسشىسىنا العىس بىلدىرەمىز»، - دەدى وبلىس اكىمى.
اباي وبلىسىندا بۇگىندە 31 ستاسيونارلىق مەديسينالىق ۇيىم جۇمىس ىستەيدى، ونىڭ ىشىندە 20-سى مەملەكەتتىك، 11ء-ى جەكەمەنشىك. وبلىس بويىنشا ءار 10 مىڭ تۇرعىنعا نەبارى 59 توسەك-ورىننان كەلەدى. بۇل – رەسپۋبليكا بويىنشا ەڭ تومەنگى كورسەتكىشتەردىڭ ءبىرى.
وبلىستىق مامانداندىرىلعان مەديسينالىق قىزمەتتىڭ 70 پايىزى سەمەي قالاسىندا شوعىرلانعان. قازىرگى ستاسيونارلاردىڭ باسىم بولىگى ەسكى، ماتەريالدىق-تەحنيكالىق بازاسى توزعان. جەدەل مەديسينالىق جاردەم اۋرۋحاناسى 300 توسەككە شاقتالعانىمەن ءىس جۇزىندە 375 ناۋقاستى قابىلداپ وتىر. كارديولوگيا، ينسۋلت، گينەكولوگيا، توكسيكولوگيا، نيەۆرولوگيا، تراۆماتولوگيا بولىمدەرىندە توسەك-ورىن تاپشى. جاڭا اۋرۋحانا وسى تاپشىلىقتى جويىپ، زاماناۋي تالاپتارعا ساي مەديسينالىق كومەك كورسەتۋدى قامتاماسىز ەتەدى. سونىمەن قاتار، اۋىل تۇرعىندارى ءۇشىن قاشىقتان كەڭەس بەرەتىن تەلەمەديسينا ورتالىعى قۇرىلادى. مەديسينالىق نىسان 2027 جىلى پايدالانۋعا بەرىلمەك.
