Semei qalasynyń Vodnyi kentinde 600 oryndyq jańa mektep ǵimaratynda ashyq esik kúni uiymdastyryldy. Is-shara «Keleshek mektepteri» ulttyq jobasy aiasynda salynyp jatqan bilim ordasynyń múmkindikterin tanystyrý maqsatynda ótti.
Jańa úlgidegi úsh qabatty №52 mektep 2025-2026 oqý jylynda ashylady. Bul – joba boiynsha Abai oblysyndaǵy úshinshi, Semei qalasyndaǵy ekinshi mektep. Buǵan deiin Qaraǵaily shaǵynaýdanynda 1200 oryndyq, al Besqaraǵai aýdanynda 300 oryndyq mektep paidalanýǵa berilgen.
Ashyq esik kúnine 100-den astam ata-ana, 60-qa jýyq oqýshy, muǵalimder, buqaralyq aqparat quraldary ókilderi, blogerler, sondai-aq oblystyq jáne qalalyq bilim bólimderiniń mamandary qatysty. Qonaqtar sport jáne akt zaly, ashana, horeografiia zaly, bastaýysh jáne arnaiy pán kabinetteri, STEM-zerthanalar, robototehnika kabineti, kovorking aimaqtary, kitaphana jáne oqý zalyn aralady. Mektep aýlasynda fýtbol, voleibol, basketbol alańdary men júgirý jolaqtary salynǵan.
– Bastaýysh jáne orta býyn synyptary bólek bloktarda ornalasyp, bastaýysh oqýshylaryna qaýipsiz ári jaily orta qamtamasyz etilgen. Ár kabinet interaktivti taqta men jańa kompiýterlermen jabdyqtalǵan. Robototehnika, 3D modeldeý jáne mýltimedialyq úiirmeler balalardyń tsifrlyq saýattylyǵyn arttyrýǵa múmkindik beredi, – dedi №52 jalpy orta bilim beretin mektep direktorynyń mindetin atqarýshy Tilek Sapyshev.
Mektepte 28 zamanaýi oqý kabineti, fizika, himiia, biologiia zerthanalary, informatika jáne robototehnika kabinetteri, grafika jáne modeldeý bólmesi, aǵash jáne metall óńdeý tsehtary, aspazdyq jáne tigin sheberhanalary ornalasady. Oqý protsesine 30 interaktivti panel, noýtbýkter, statsionarlyq kompiýterler men printerler qoiylady.
Inkliýzivti bilim berý talaptaryna sai ǵimarat lift, pandýstar, taktildi jolaqtar jáne arnaiy sanitarlyq toraptarmen jabdyqtalǵan. Qaýipsizdik maqsatynda beinebaqylaý júiesi, týrniketter, órt dabyly, 19 apattyq shyǵý esigi jáne 7 baspaldaq qarastyrylǵan.
Ata-analar men oqýshylar jańa mekteptiń keń ári jaryq kabinetterin joǵary baǵalap, mundai ashyq esik kúniniń oblys aýmaǵynda alǵash ret ótkizilip otyrǵanyn atap ótti.
– Eki nemeremdi osy «Keleshek mektebinde» oqytpaqpyn. Qurylysy sándi, zaman talabyna sai salynǵan. Kabinetterdi aralap kórdik, bári jaryq ári keń. 1-4 synyp oqýshylary ashanada tegin tamaqtanady. Akt zaly da óte jaqsy. Bastaýysh synyptar shyǵys blogynda, orta synyptar ekinshi qabatta, joǵary synyptar joǵarǵy qabatta oqidy. Kabinet qabyrǵalaryndaǵy formýlalar men naqyl sózder oqýshylarǵa shabyt beredi, – dedi mektep oqýshysynyń ata-anasy Úzim Ramazanqyzy.
Jalpy, «Keleshek mektepteri» jobasy aiasynda óńirde bes jańa bilim berý nysany salynady. Aiagóz aýdanyndaǵy 600 oryndyq mektep biyl kúzde ashylsa, Semeidiń Shyǵys kentinde 300 oryndyq mekteptiń qurylysy biyl bastalady.
