Semeide «Elimai» fýtbol klýbynyń tanystyrylymy boldy. Shara barysynda kópshilikke komandanyń negizgi jáne jastar quramalary men bapkerlik shtab músheleri resmi túrde tanystyryldy. Erekshe atap óterligi, klýb quramynda alǵash ret qyzdar komandasy quryldy,- dep habarlaidy Dalanews.kz
Tanystyrylymǵa oblys ákimi Berik Ýáli qatysyp, komandany jańa maýsymnyń bastalýymen quttyqtap, sáttilik tiledi.
«Prezidentimizdiń Jarlyǵymen qaita qurylǵan oblysymyzda qaita jańǵyrǵan «Elimai» Birinshi ligany bir de bir jeńilissiz ótkizip, Premer-ligaǵa kóterilip, qazir myqty ujymdar sanatynda keledi. Biylǵy basty jańalyǵymyz – qyzdar komandasynyń qurylýy. Olar da «Qairat» komandasyn syrt alańda jeńip, sensatsiia jasady. Biz sizderdi árdaiym qoldaimyz, sizdermen birgemiz! Komandanyń basynan nebir jaisyz jyldar ótkende de jankúierlerińiz sizderge adaldyq tanytty. Qýanyshty sátterde ǵana emes, qiyn kezeńderde de birge bolý degen osy», – dedi aimaq basshysy.
«Elimai» fýtbol klýbynyń ókilderi aimaq basshysyna estelikke jańa jeide syiǵa tartty.
Komanda Qazaqstan premer ligasynyń 4 týry aiasynda taldyqorǵandyq «Jetisýdi» qabyldap, 3:0 esebimen jeńiske jetti. Jergilikti qurama týrnirlik kestede 13 upaimen 3-inshi orynda keledi. Jerlesterimiz 4 mamyrda «Spartak» stadionynda «Oqjetpes» komandasymen kezdesedi.
Búginde Semei qalasynda 1500-ge jýyq balany «Elimai» fýtbol ortalyǵynda kásibi jattyqtyrýshylar baptap júr. Komanda Kókpekti, Aiagóz, Abai jáne Aqsýat aýdandarynda aýyl jastaryna arnap joldastyq kezdesýler ótkizip, fýtboldy aýdandarda keńinen nasihattap júr. Jýyrda «Ushaqtar» shaǵyn aýdanynda jańa stadion qoldanysqa berildi.
