Semeide chipter men elektrondy qondyrǵylardy óndiretin indýstriialyq parktiń qurylysy bastaldy. Búgin joǵary tehnologiialyq ónimder óndiretin zaýyttyń irgetasyn qalaý rásimi ótti. Oǵan oblys ákimi Berik Ýáli jáne shet eldik investorlar qatysty, – dep habarlaidy Dalanews.kz
Jobany qazaqstandyq-qytailyq birlesken kompaniia «SUTO KAZAKHSTAN» JShS Semeidegi «Óndiris» indýstriialyq aimaǵynda júzege asyrady. Jańa kásiporynda chip, optoelektrondy modýl, intellektýaldy host-kontroller, qýat blogy, energiia únemdeitin shamdar men elektrondy displeiler óndiriletin bolady.
Oblys ákimi bastaǵan óńir delegatsiiasy jaqynda Qytaidyń Shyńjań uiǵyr avtonomiialy ólkesiniń Altai qalasyna baryp, halyqaralyq «Úlken Altai» sýbóńirlik konferentsiiasyna qatysyp qaitqan edi. Aýqymdy shara aiasynda Abai oblysy men qytai investorlary arasynda quny 1,5 milliard AQSh dollaryn quraityn 15 memorandýmǵa qol qoiyldy. Jańa óndiris ornynyń irgetasynyń qalanýy sol sapardyń alǵashqy naqty nátijesi.
Zaýyttyń irgetasyn qalaý rásiminde sóz sóilegen aimaq basshysy joba óńir ekonomikasyn ártaraptandyrýǵa, jańa jumys oryndaryn ashýǵa jáne joǵary tehnologiialyq salalardy damytýǵa úlken serpin beretinin atap ótti.
«Búgin bizdiń oblysymyz úshin aitýly kún. Semei qalasynda joǵary tehnologiialy zaýyttyń irgetasyn qalap jatyrmyz. Bul zamanaýi elektroquraldar men jaryqtandyrý júielerine arnalǵan chipter (diodtar) shyǵaratyn kásiporyn bolady. Mundai óndiris elimizde birinshi ret qolǵa alynyp jatyr. Qurylys kezeńinde 140 adam jumyspen qamtylsa, zaýyt iske qosylǵannan keiin 500-den astam turaqty jumys orny ashylady. Qurylysqa jergilikti azamattar, Semei qalasynyń turǵyndary tartylady. Joba tolyq iske asqan kezde qyzmetkerler 250 myń men 500 myń teńge aralyǵynda jalaqy alatyn bolady. Halyqtyń ál-aýqatyn jaqsartýǵa, oblys turǵyndaryna jańa jumys oryndaryn ashýǵa zor múmkindik. Ákimdik tarapynan barlyq qoldaýdy kórsetetin bolamyz», - dedi aimaq basshysy.
Erekshe atap óterligi, kásiporyn Semeidegi IT jáne jańa tehnologiialar joǵary kolledjiniń stýdentterin óndiristik tájiribeden ótkizip, keiin zaýytqa turaqty jumysqa alýǵa niet bildirip otyr. Oqý orny men kompaniia ókilderi kelisimge kelip, yntymaqtastyq jónindegi memorandýmǵa qol qoidy.
Joba quny 50 million AQSh dollaryn quraidy. 2025-2028 jyldar aralyǵynda úsh kezeńmen iske asyrylady. Bolashaqta zaýyt ónimderi ishki naryqpen qatar, TMD elderi men Eýropaǵa eksporttalmaq.
«Endi Semei qalasynyń mańynda «Qazaqstanda jasalǵan» tańbasymen mikroshemalar men chipter óndiretin zamanaýi kásiporyn paida bolady. Bizge 20 gektar jer berildi. Birinshi kezeńde negizgi ǵimaratty, qurylǵylar turatyn zaýyttyń tsehtaryn salamyz. Josparymyz boiynsha kásiporynnyń alǵashqy ǵimaratynyń qurylysyn 90 kúnde aiaqtasaq, alǵashqy ónimdi shyǵara beremiz. Negizgi maqsat – chip óndirý. Mundai chipter buǵan deiin Qazaqstanda óndirilmegen, tek qurastyrylǵan», - dedi «Suto Kazakhstan» jaýapkershiligi shekteýli seriktestiginiń quryltaishysy Ernur Bolatuly.
