Abai oblysynyń ákimi Berik Ýáli Semei qalasynda salynyp jatqan kópirdiń qurylysymen tanysyp, jumys barysyn baqylap, jaýapty tulǵalarǵa naqty tapsyrma júktedi,- dep habarlaidy Dalanews.kz
Nysan qurylysyna eki aýysymda 130-dan astam adam jumyldyrylǵan. Qazirgi tańda 9 tireýdiń 5-ýi ornatylyp, kópir ótkeliniń metall konstrýktsiialary qurastyrylyp jatyr. Jyl sońyna deiin kópir ótkeliniń negizgi bóligi qurastyrylyp, kelesi jyly asfalt tóselmek.
Oblys ákimi kópirdiń qala úshin strategiialyq mańyzy zor ekenin atap ótti. Qazirgi ýaqytta jobanyń qymbattaýyna bailanysty qosymsha qarjylandyrý máselesi qarastyrylyp otyr. Osyǵan orai kópirdi respýblikalyq menshikke berý múmkindigi kún tártibinde tur.
«Oblys mártebesin alǵannan keiin Semei qalasynda halyqtyń sany ósti. Shaharda kólik kóbeidi. Turǵyndar bul kópirdiń tezirek paidalanýǵa berilgenin kútip otyr. Sondyqtan qurylysty sapaly júrgizip, belgilengen merzimde aiaqtaý kerek»,- dedi aimaq basshysy.
