اباي وبلىسىنىڭ اكىمى بەرىك ءۋالي سەمەي قالاسىندا سالىنىپ جاتقان كوپىردىڭ قۇرىلىسىمەن تانىسىپ، جۇمىس بارىسىن باقىلاپ، جاۋاپتى تۇلعالارعا ناقتى تاپسىرما جۇكتەدى،- دەپ حابارلايدى Dalanews.kz
نىسان قۇرىلىسىنا ەكى اۋىسىمدا 130-دان استام ادام جۇمىلدىرىلعان. قازىرگى تاڭدا 9 تىرەۋدىڭ 5ء-ۋى ورناتىلىپ، كوپىر وتكەلىنىڭ مەتالل كونسترۋكسيالارى قۇراستىرىلىپ جاتىر. جىل سوڭىنا دەيىن كوپىر وتكەلىنىڭ نەگىزگى بولىگى قۇراستىرىلىپ، كەلەسى جىلى اسفالت توسەلمەك.
وبلىس اكىمى كوپىردىڭ قالا ءۇشىن ستراتەگيالىق ماڭىزى زور ەكەنىن اتاپ ءوتتى. قازىرگى ۋاقىتتا جوبانىڭ قىمباتتاۋىنا بايلانىستى قوسىمشا قارجىلاندىرۋ ماسەلەسى قاراستىرىلىپ وتىر. وسىعان وراي كوپىردى رەسپۋبليكالىق مەنشىككە بەرۋ مۇمكىندىگى كۇن تارتىبىندە تۇر.
«وبلىس مارتەبەسىن العاننان كەيىن سەمەي قالاسىندا حالىقتىڭ سانى ءوستى. شاھاردا كولىك كوبەيدى. تۇرعىندار بۇل كوپىردىڭ تەزىرەك پايدالانۋعا بەرىلگەنىن كۇتىپ وتىر. سوندىقتان قۇرىلىستى ساپالى جۇرگىزىپ، بەلگىلەنگەن مەرزىمدە اياقتاۋ كەرەك»،- دەدى ايماق باسشىسى.
