Semei qalasyndaǵy jedel meditsinalyq járdem aýrýhanasy basshysynyń aitýynsha, atalmysh aýrýhana 9 shildege deiin kópsalaly emhana retinde jumys istegen. 9 shildeden keiin statsionar koronavirýs infektsiiasymen aýyrǵan naýqastarǵa kómek kórsetken.
– 9 shildege deiin kópsalaly statsionar retinde jumys istep, tiisti eńbekaqymyzdy aldyq. Keiin jedel meditsinalyq járdem aýrýhanasyna 270 provizorlyq pen 30 infektsiialyq tósekpen qamtamasyz etildi. 9 shildeden bastap dárigerler koronavirýs infektsiiasymen kúresýge kiristi. Olar negizgi eńbekaqysyna sáikes qosymsha aqy alady. Komissiianyń sheshimimen tiisti qujattar qaralady. Barlyq meditsinalyq qyzmetkerler Densaýlyq saqtaý ministriniń buiryǵyna sáikes 10 tamyzda qosymsha aqy alady, – dedi Iliias Muhamedjan.
Budan bólek, oblystyq densaýlyq saqtaý basqarmasynyń basshysy dárigerler negizgi eńbekaqasyn alatynyn jáne osy kúnge deiin jumys istegenderine bailanysty tólenetinin jetkizdi.
Qosymsha aqy qyzmetkerlerdiń provizorlyq jáne infektsiialyq statsionarlarda jumys istegen saǵattaryna tólenedi. Eger dáriger provizorlyq statsionarda belgilengen saǵat boiynsha eńbek etse, oǵan qosymsha 425 myń teńge beriledi. Provizorlyq bólimshede jumys istegenderge 850 myń teńge tólenedi.
«Áleýmettik meditsinalyq saqtandyrý qorynyń» Shyǵys Qazaqstan oblysy boiynsha filialynyń direktory Ǵalymjan Ábilovtiń aitýynsha, búgin oblystaǵy barlyq meditsinalyq uiymdardyń tólem týraly ótinishteri jinaqtaldy.
– Biz árbir meditsina qyzmetkeriniń provizorlyq jáne infektsiialyq statsionarlarda qansha saǵat boiy jumys istegenderi týraly tizimdi aldyq. Qazir tiisti qujattar óńirlik komissiianyń qaraýyna berildi. Erteń komissiia músheleriniń qatysýymen jinalys ótedi. Qor hattama toltyrǵan soń kategoriia boiynsha qyzmetkerlerge qosymsha aqy tóleýge kirisemiz. Bul kelip túsken ótinishterge bailanysty qarastyrylyp, koronavirýspen kúreskenderi úshin tólenedi, – dedi Ǵalymjan Ábilov.
