Úkimet burynǵy Semeı ıadrolyq polıgony aýmaǵynan 71,37 gektar jer telimin Altyn Group Qazaqstan kompanıasyna berý týraly qaýly qabyldady. Tıisti qujatqa premer-mınıstr Oljas Bektenov qol qoıdy, dep habarlaıdy Dalanews.kz.
Altyn Group Qazaqstan Ulybrıtanıalyq A Gold Plc kompanıasyna tıesili. Bul kásiporyn Abaı oblysyndaǵy Úlken Qarashoqy ken ornyn ıgerip, altyn óndirý kólemin arttyrýdy josparlap otyr.
Úkimettiń qaýlysyna sáıkes, burynǵy Semeı ıadrolyq synaq polıgony aýmaǵyndaǵy bos jatqan jerler ónerkásiptik maqsattarǵa arnalǵan sanatqa aýystyrylǵan. Altyn Group Qazaqstan kompanıasyna bul aýmaq 2028 jyldyń 31 jeltoqsanyna deıin ýaqytsha óteýli jer paıdalaný (jaldaý) quqyǵymen berildi.
Osyǵan baılanysty kásiporyn respýblıkalyq búdjetke aýyl sharýashylyǵy alqaptaryn alyp qoıýdan týyndaǵan shyǵyndardy óteýge mindetti.
2024 jyldyń sońynda kompanıa Abaı oblysyndaǵy baıytý fabrıkasyn jańǵyrtý josparyn usynǵan. Bul jańǵyrtý nátıjesinde kásiporyn burynǵy Semeı ıadrolyq polıgonyndaǵy ken ornynan ǵana emes, sondaı-aq qaldyq qoımalaryndaǵy shıkizattan da mys pen altyn óndirýge múmkindik alady.
Sonymen qatar Altyn Group Qazaqstan Pavlodar oblysyndaǵy Maılyqara ken ornynda altyn-kúmis óndirýdi bastaýdy kózdep otyr. Bul ken orny da burynǵy Semeı ıadrolyq polıgony aýmaǵynda ornalasqan. Kompanıa 2028 jylǵa deıin bul jerdi tolyq ıgerýdi josparlaýda.
