ۇكىمەت بۇرىنعى سەمەي يادرولىق پوليگونى اۋماعىنان 71،37 گەكتار جەر تەلىمىن Altyn Group Qazaqstan كومپانياسىنا بەرۋ تۋرالى قاۋلى قابىلدادى. ءتيىستى قۇجاتقا پرەمەر-مينيستر ولجاس بەكتەنوۆ قول قويدى، دەپ حابارلايدى Dalanews.kz.
Altyn Group Qazaqstan ۇلىبريتانيالىق A Gold Plc كومپانياسىنا تيەسىلى. بۇل كاسىپورىن اباي وبلىسىنداعى ۇلكەن قاراشوقى كەن ورنىن يگەرىپ، التىن ءوندىرۋ كولەمىن ارتتىرۋدى جوسپارلاپ وتىر.
ۇكىمەتتىڭ قاۋلىسىنا سايكەس، بۇرىنعى سەمەي يادرولىق سىناق پوليگونى اۋماعىنداعى بوس جاتقان جەرلەر ونەركاسىپتىك ماقساتتارعا ارنالعان ساناتقا اۋىستىرىلعان. Altyn Group Qazaqstan كومپانياسىنا بۇل اۋماق 2028 جىلدىڭ 31 جەلتوقسانىنا دەيىن ۋاقىتشا وتەۋلى جەر پايدالانۋ (جالداۋ) قۇقىعىمەن بەرىلدى.
وسىعان بايلانىستى كاسىپورىن رەسپۋبليكالىق بيۋدجەتكە اۋىل شارۋاشىلىعى القاپتارىن الىپ قويۋدان تۋىنداعان شىعىنداردى وتەۋگە مىندەتتى.
2024 جىلدىڭ سوڭىندا كومپانيا اباي وبلىسىنداعى بايىتۋ فابريكاسىن جاڭعىرتۋ جوسپارىن ۇسىنعان. بۇل جاڭعىرتۋ ناتيجەسىندە كاسىپورىن بۇرىنعى سەمەي يادرولىق پوليگونىنداعى كەن ورنىنان عانا ەمەس، سونداي-اق قالدىق قويمالارىنداعى شيكىزاتتان دا مىس پەن التىن وندىرۋگە مۇمكىندىك الادى.
سونىمەن قاتار Altyn Group Qazaqstan پاۆلودار وبلىسىنداعى مايلىقارا كەن ورنىندا التىن-كۇمىس ءوندىرۋدى باستاۋدى كوزدەپ وتىر. بۇل كەن ورنى دا بۇرىنعى سەمەي يادرولىق پوليگونى اۋماعىندا ورنالاسقان. كومپانيا 2028 جىلعا دەيىن بۇل جەردى تولىق يگەرۋدى جوسپارلاۋدا.
