2023 jylǵy «Semei ormany» rezervatyndaǵy alapat órt kezinde qaza tapqan ormanshylardyń taǵdyryna negizdelgen «38. Sońǵy núkte» kórkem filmi keń prokatqa shyqty, dep habarlaidy dalanews.kz.
Film avtory Maqsat Jumahanovtyń ózi de ormanshy. Onyń aitýynsha, kartina ideiasy kino salasynan emes, ormandaǵy kúndelikti jumysynan jáne osy salada eńbek etetin azamattardyń ómirinen týǵan.
«Men ózim ormanshymyn. Kinoǵa da, mediaǵa da qatysym bolǵan joq. Bul oqiǵa meniń ózime jaqyn, sebebi men osy salanyń ishindemin. Meniń ormanshy bolyp júrgen baýyrlarym, áriptesterim bar. Olardyń kúndelikti eńbegin, qandai jaǵdaida jumys isteitinin, qandai qaýipke baratynyn jaqsy bilemin. Sondyqtan osy oqiǵany ekranǵa shyǵarý týraly oi paida boldy. Al ony júzege asyrýǵa rejisserler men shyǵarmashylyq toptaǵy jigitter kóp kómektesti. Men ormanshy retinde biletin dúnielerimdi aityp berdim, al olar sol oqiǵany kino tilimen jetkizýge múmkindik jasady», – dedi Maqsat Jumahanov.
Filmge 2023 jyly «Semei ormany» aýmaǵynda bolǵan alapat orman órti negiz bolǵan. Sol qaiǵyly oqiǵa kezinde 15 orman sharýashylyǵy qyzmetkeri qaza tapqan. Kartina avtorlary film arqyly qyzmettik mindetin atqarý kezinde ómirin qiǵan azamattardyń erligin eske alyp, olardyń rýhyna taǵzym etýdi maqsat etken.
«Bul filmdi túsirý biz úshin jai ǵana kino jasaý bolǵan joq. Biz sol kezde qaza bolǵan azamattardy umytpaýymyz kerek dep oiladyq. Olar óz mindetin atqaryp júrip ómirden ótti. Sondyqtan olardyń esimi, eńbegi men taǵdyry keiingi urpaqqa jetse deimiz. Bul sol azamattardy eske alý, olardyń otbasylaryna degen qurmetimiz», – dedi film avtory.
Film siýjeti tabiǵi apatpen betpe-bet kelgen ormanshylardyń oqiǵasy arqyly órbidi. Keiipkerlerdiń taǵdyry negizinde adam ómiriniń qundylyǵy, dostyq pen otbasy, borysh pen jeke tańdaý máseleleri kóteriledi.
Kartinada ormanshylardyń kásibi mindeti ǵana emes, tótenshe jaǵdaida qabyldaityn sheshimderi men adam ómirine degen jaýapkershiligi de kórsetiledi. Film kórermendi tabiǵatqa uqypty qaraýǵa jáne ormanshylar eńbeginiń mańyzyn baǵalaýǵa úndeidi.
«38. Sońǵy núkte» filminiń rejisseri – Tórebek Beisebaev, prodiýseri – Nurjigit Haidar. Basty rólderdi Asan Májit, Arman Ýahitov, Altynshash Shaiahmet, Almat Sakatov, Tólepbergen Baisaqalov, Asylbek Áitish jáne Maqsat Sabitov somdaidy.
Kinokartina Qazaqstan Respýblikasy Mádeniet jáne aqparat ministrliginiń tapsyrysy boiynsha Ulttyq kinony qoldaý memlekettik ortalyǵynyń qoldaýymen túsirilgen.
Film 3 qyrkúiekten bastap Qazaqstan kinoteatrlarynda keń prokatqa shyqty.
