Tamyzdyń alǵashqy on kúninde Qazaqstan shekarasynan iri kólemde qolma-qol aqshany deklaratsiiasyz alyp ótpek bolǵan 70 jaǵdai anyqtaldy. Tárkilengen valiýtanyń jalpy quny 645 mln teńgeden asady, dep habarlaidy dalanews.kz.
UQK Shekara qyzmetiniń málimetinshe, zańbuzýshylyqtar 1-10 tamyz aralyǵynda ótkizý beketterindegi baqylaý kezinde tirkelgen. Jariialanǵan sýretterden keibir azamattardyń býma-býma aqshany aiaqtaryna orap, kiiminiń astyna jasyrǵanyn kórýge bolady.
Iri faktilerdiń biri Jambyl oblysyndaǵy «Qordai» avtomobil ótkizý pýnktinde anyqtalǵan. Shekarashylar sheteldik azamattyń kiiminiń astynan jasyrylǵan 70 myń dollardy tapqan. Bul shamamen 32,5 mln teńgege teń.
Anyqtalǵan barlyq derek boiynsha materialdar tiisti organdarǵa joldandy. Endi olarǵa qatysty zań aiasynda sheshim qabyldanady.
Aita keteiik, Qazaqstannan qolma-qol shetel valiýtasyn áketýge qatysty shekteýler bar. Qoldanystaǵy talaptarǵa sáikes, 10 myń AQSh dollary balamasynan asatyn somalarǵa arnaiy talaptar qoldanylady.
