Biz ártúrli keisterdi zerttedik. Arab Ámirlikteriniń, Singapýrdyń tájiribesin zerdeledik. Olar negizinen Microsoft sheshimin paidalanady.
Alaida biz 2017 jyldan beri Qazaqstan Respýblikasy retinde Microsoft kompaniiasymen kelissóz júrgizýge barynsha tyrysyp kórgen bolatynbyz. Shynyn aitqanda, álemdik bul kompaniia bizge shyǵys kodyn berer degen úmitte boldyq. Ol jerge bir ret qana kóz salyp, ne jazylǵanyn kórip, sertifikattaý úshin birlesken jumysqa kúsh salǵanbyz. Alaida olar bizben jumys isteýden bas tartty. Sol sebepti biz Qazaqstannyń Ulttyq qaýipsizdik komitetiniń talaptaryn jáne aqparattyq qaýipsizdik zańnamasyn qanaǵattandyratyn sheshimdi izdei bastadyq, - deidi Baǵdat Mýsin.
Onyń aitýynsha, Sber kompaniiasymen jasalǵan memorandýmda "Alaiaqtar ainalyp ótip kirip ketpeitindei qýys-tesikter joqtyǵyna kóz jetkizý úshin Qazaqstanǵa ashyq shyǵys kodtary kerektigi aq paraqqa qap-qara áriptermen" anyq jazylǵan.
Sondyqtan ministr bul memorandýmdy júieli sheshim dep atady. Aitýynsha, osy memorandýmǵa qol qoiar aldynda Prezident Ákimshiligimen, Úkimetpen, Ulttyq qaýipsizdik komitetimen tereń talqylanǵan.
Mundai sheshimdi biz bir minýtta nemese bireýdiń qysymymen qabyldaǵan joqpyz. Ózderińiz biletindei, German Oskrovichpen (SberBank basshysy) birneshe ret kezdestik. Jalpy IT salasynyń keleshegi ne bolyp jatqanyn sol kisimen talqyladyq. Mail.rý men Iandeksti zerttedik.
Alaida qazirgi tańda bizdi aqparattyq qaýipsizdik bolsyn, platformalyq modelderdiń talaptary jaǵynan bolsyn qanaǵattandyratyn birden bir platforma – sberlik joba ekenin uǵyp, túisinip otyrmyz, – deidi ol.
Baǵdat Mýsinniń aitýynsha, qazaqstandyqtardyń málimetterimen, biznes-protsesterdiń jumystarymen reseilik mamandardyń qolymen emes, qazaqstandyq IT mamandardyń qolymen jasalady.
Ministr atap ótkendei, qazaqstandyqtardyń málimetterin basqa elge basqarýyna berip qoiýǵa Qazaqstannyń zańy ruqsat bermeidi.
Málimetter bazasy – Qazaqstan Respýblikasynyń aýmaǵynda, qorǵalatyn jerde saqtalady. Memorandýmda jazylǵandai "ol jerde reseilik mamandar qol jetkize almaidy!" Eger tipti qandai da bir tehnologiialyq qoldaý úshin reseilik mamandar bizge tartylǵan jaǵdaida da bul jumys bizdiń memlekettik-tehnikalyq qyzmettiń mamandarynyń baqylaýymen jasalady. Bizdiń biznes ókilderiniń 90 paiyzy máselen Adines júiesin paidalanady. Biz málimetterimizdiń barlyǵy Reseide demeimiz ǵoi. Málimetterdiń bári de bizdiń serverlerde bolady. Bul jerde shybyndy túieden ajyratyp alý kerek. Reseilik mamandardyń birde biriniń oǵan qoly jetpeidi, - deidi ol.
Ministr kelesi jyldyń sáýirinde jobanyń barlyq jan-jaqty parametrin aiqyndaityn kelisimge qol qoiylatynyn málim etti.
Jobanyń somasy týraly ártúrli alypqashpa áńgime tarap ketipti. Bireýler 5 mlrd dollar ketedi eken deidi. Ol jalǵan aqparat. Shamamen 500 mln dollar kerek. Biraq ekonomikalyq zertteýler kezinde qarajat pysyqtalady, - deidi ol.
