Iá, Bókeń aǵasy el basqaryp turǵanda talaı dúnıeni atyna jazyp alǵanyn jurttyń bári biledi. Eski Qazaqstanda bul kisilerge «áı deıtin aja, qoı deıtin qoja» bolmady ǵoı.
Sondyqtan kópshilik Bolat Nazarbaevtyń aǵasynyń bedelin paıdalanyp, atyna jazyp alǵan dúnıe-múlikti memleket menshigine qaıtarǵanyn qoldaıdy.
Osy bir jańalyqty súıinshilep kópshilikke jetkizgen Erlan Saırov myrzaǵa rahmet.
Biraq Erekeń jarıalaǵan bir aýyz aqparattyń astynda halyq «Bolat Nazarbaev reıdrlik jolmen alǵan dúnıesin qaıtara salyp, júre bere me?» dep eks-depýtatqa saýal da joldapty.
Osy suraqty «Amanat» partıasynan depýtattyqqa úmitker Erlan Saırov joǵary bılikke qoısa qandaı jaqsy bolar edi.
Óıtkeni Erekeń elimizdiń qoǵamdyń-saıası ómirinde óz oryny bar azamat emes pe?
«Bolat Nazarbaevtyń dúnıe-múlki memleket menshigine qaıtty» dep kez kelgen adam eki aýyz post jazyp, habar tarata alady.
Al Erekeńniń joǵary jaqqa «Zaýytty qalaı qaıtardyńdar? Bókeń memleket menshigin menshiktegende zań buzdy ma?» degen saýaldardy ashyq qoıyp, jaýap alatyn múmkindigi de, abyroı-bedeli de bar ǵoı.
Toqaevqa Jańa Qazaqstannyń qabyrǵasyn qalasyp júrgen Erlan Saırov dál osy istiń sońyna túsip alǵanyn halyq ta qalaıtyny anyq.
Quzyrly oryndardyń Bókeńniń atyna jazylǵan aksıany memleketke kúni keshe ǵana qaıtarǵanyn bilemiz.
Demek, aldaǵy ýaqytta «Amanattyń» jampozy Erlan Saırovtan osy istiń sońyna túsip, keń kólemdi aqparat berip qalar dep te úmittenemiz (endi Saırovtyń paraqshasyn ańdyp otyramyz).
Sol kezde Saırovtyń halyq aldynda bedeli ósip, osy bir ispen-aq tarıhta aty qalar edi.
Áıtpese munaı eki aýyz sóz aqparatty «Amanattyń» baspasóz qyzmetinde isteıtin qyz-jigitter de taratady ǵoı.
Sonyqtan Erekeńnen kesek dúnıe, Bolat Nazarbaev isine qatysty tereń zertteý kútemiz.
Sol kezde Erekeń, el syılaıtyn myqty saıasatkerge aınalatyny anyq.
Erlan myrza, Bókeńniń sońyna túsip, ishken-jegenderin qustyryp, zań aldynda jaýapqa tartqansha toqtamańyz.
Óıtkeni siz masshtabyńyz aýqymdy, saıası keleshegińiz zor azamatsyz ǵoı. Saılaý ótken soń osy isti dereý qolǵa alyńyz, halyq sizge qoldaý kórsetedi.
