Túriktiń «Gen group Qazaqstan» kompaniiasy 5,3 gektar jylyjai keshenin salyp, banan otyrǵyzǵan. Ósiriletin banan sorty arnaiy Qazaqstannyń klimattyq jaǵdailaryna beiimdelgen. Alǵashqy ónimdi 6 aidan keiin jinaý josparlanýda.
Kásiporyn basshysy Timýr Ýteshov aldaǵy ýaqytta mango, avokado syndy jemis túrlerin óndirýdi josparlap otyr.
Ekzotikalyq jemisterden basqa, jylyjaida qyzanaq pen qulpynai ósiriledi. Jobanyń birinshi kezeńdegi quny 4 mln dollardy quraidy. Qurylys sapasy joǵary, jylyjailar klimattyq baqylaý men beiimdelgish qorektendirý júiesimen jabdyqtalǵan.
Qazaqstanda balamasy joq kásiporyn jaqyn arada jylyjai jerin 5 gektarǵa keńeitpek. Qainarbulaq aýyldyq okrýginde ornalasqan jylyjai jylyna shamamen 1000 tonna banan óndirýge múmkindik beredi. Bul ishki naryqtyń qajettiligin 1% qamtamasyz etip otyr.
Oblys basshysy egistikti ártaraptandyrýdyń mańyzdylyǵyn atap ótti.
– Egistikti ártaraptandyrý, balans ustaý asa mańyzdy. Biz jyl saiyn tek bir daqyldardy ekpeýimiz kerek. Naryqqa nazar aýdaryp, joǵary suranysqa ie dúnielerdi baqylaǵan jón. Ózimizdi barlyq qajetti ónimdermen qamtamasyz etý jáne sol arqyly baǵany turaqtandyrý úshin aimaqtyń azyq-túlik qaýipsizdigi salasyna barynsha qamqorlyq tanytý qajet, – dep atap ótti Darhan Satybaldy.
Egistikti sýarmaly sýmen qamtý máselesine kóńil bólgen aimaq basshysy barlyq qolda bar múmkindikterdi paidalanýdy, atap aitqanda, jer asty sýlarynyń qorlaryn zertteý jumystaryn jalǵastyrýdy, sondai-aq barlyq sý resýrstarynyń teńgerimin zerdeleýdi tapsyrdy.
Sapar barysynda oblys basshysy Darhan Satybaldy Sairam aýdanyndaǵy qurama jem shyǵaratyn zaýyttyń jumysymen tanysty. Óndiris orny jylyna 60 myń tonna mal azyǵyn óndiredi. Búginde zaýyt ónimin ishki naryqqa jáne Ózbekstan Respýblikasyna eksportqa jiberýde. Atalǵan nysannyń jobalyq quny 600 mln teńge. Jergilikti turǵyndar turaqty jumyspen qamtylǵan.
