Saıramda aýdandyq Qazaqstan halqy Assambleıasynyń İ sesıasy ótti. Jıyndy aýdandyq QHA tóraǵasy, aýdan ákiminiń mindetin ýaqytsha atqarýshy Serjan Dúısebaev júrgizdi,- dep habarlaıdy Dalanews.kz
Sesıa jumysyna oblystyq qoǵamdyq damý basqarmasy basshysynyń orynbasary, Assambleıa hatshylyǵynyń meńgerýshisi Nursultan Seıtjanov, aýdandyq Assambleıa jáne úkimettik emes uıym músheleri, aýyldyq okrýg ákimderi men bólim basshylary, aýdandyq máslıhat depýtattary, zıaly qaýym jáne buqaralyq aqparat quraldarynyń ókilderi qatysty.
"Assambleıa – elimizdegi beıbitshilik pen birliktiń berik dińgegi. Ol ár etnostyń mádenıeti men dástúrin saqtap, ortaq qundylyqtar tóńireginde biriktiredi. QR Prezıdentiniń tapsyrmasyna sáıkes, Assambleıa etnosaralyq tatýlyq pen qoǵamdyq kelisimdi nyǵaıtý isinde negizgi ról atqarady. Mine, búgin Saıram aýdanynda Qazaqstan halqy Assambleıasynyń alǵashqy otyrysy ótti. Búginde Assambleıa bolashaq urpaqqa beıbitshilik pen kelisimniń ónegesin usynatyn biregeı ınstıtýt bolyp otyr. Aldaǵy jumystaryńyzǵa sáttilik tileımin", - dedi Nursultan Seıtjanov.
Kún tártibinde aýdandyq QHA quramy, jumys jospary men negizgi basymdyqtary tanystyryldy. Sonymen qatar, etnosaralyq qatynastardy nyǵaıtý baǵytynda atqarylyp jatqan jumystar men ózekti máseleler baıandalyp, olardyń aldyn alý sharalary sóz boldy. Budan bólek, Assambleıa músheleri men etnomádenı birlestikterdiń tóraǵalary aýdandyq QHA tarapynan júzege asyrylatyn jumystar men birlesken bastamalardy qoldaý jóninde óz oı-pikirlerin bildirdi. Sesıa qorytyndysynda qatysýshylar usynystaryn ortaǵa salyp, kelesi otyrystyń kún tártibine engiziletin máseleler talqylandy.
