Nátijesi jaman emes, Sairam aýdanynda jyldyń basynan 39 januialyq sút aýlalary ashylǵan.
Sairam aýdandyq jumyspen qamtý ortalyǵynyń direktory Aqmaral Jýlaevanyń aitýynsha, «Nátijeli jumyspen qamtýdy jáne jappai kásipkerlikti damytýdyń 2017-2021 jyldarǵa arnalǵan baǵdarlamasy» boiynsha 2018 jyly 5 434 adamdy jumyspen qamtý josparlanǵan. Aǵymdaǵy jyldyń 9 aiynda 4746 adam jumyspen qamtylypty.
«Baǵdarlamanyń 1 — baǵyty boiynsha qysqa merzimdi oqytýǵa 2018 jyly 340 adamdy joldaý josparlansa, jyl basynan 8 mamandyq boiynsha 340 adam joldandy. 2-shi baǵyty boiynsha 355 azamatty kásipkerlik negizderine oqytý josparlanǵan, 9 aida 156 azamat dáris alyp, sertifikatqa ie boldy. 2018 jyly óz isin ashý jáne sharýashylyǵyn keńeitý úshin 47 azamatqa shaǵyn nesie berý josparlanǵan bolsa, jyl basynan 65 adam nesiemen qamtylǵan», – deidi ol.
Jumys izdegen azamattar joǵaryda atalǵan baǵdarlamalarǵa qatysa alady. Ol úshin turǵylyqty mekenjaiy boiynsha jumyspen qamtý ortalyǵyna barý qajet.
Atalǵan baǵdarlamanyń igiligin kórgen azamattyń biri Aqsýkent aýylynyń turǵyny Álimjan Yrysmetov. Kásipker óz aýlasynda sútti baǵyttaǵy iri qara maldy baǵyp, ónimin jergilikti sút kompaniialaryna ótkizedi.
«Aýdandaǵy júmyspen qamtý ortalyǵynda jumyssyz bolyp tirkelgen edim. Mamandar «Nátijeli jumyspen qamtýdy jáne jappai kásipkerlikti damytýdyń 2017-2021 jyldarǵa arnalǵan baǵdarlamasy» jaily túsindirip, óz kásibimdi ashýǵa kómek kórsetti. Sonyń arqasynda biyl 4 mln. teńge nesie alyp, 16 bas siyr satyp aldym. Qazir sútin saýyp, «Fýdmasterge» ótkizip jatyrmyz. Baǵdarlama jaqsy, otbasymyzben birge jumys jasaýdamyz. Maldyń kútimine balalarym qarasady, áielim siyrlardy saýady. Bir siyr 10 -15 litrge deiin sút beredi. Sharýashylyǵymyzdy keńeitýdi josparlap qoidyq. Mal basyn 30- ǵa deiin jetkizbekpiz. 2011 jyly 2 mln. teńge nesie alyp kásibimdi bastaǵan edim. Nátijesi jaqsy. Nesieden 2014 jyly qutyldyq. Endi mine, biyl alǵan nesiemizdi 7 jylda qaitarýymyz kerek. Jeltoqsanda alǵashqy 200 myń teńgeni quiamyz. Jumys isteimin degen adamǵa úkimet tarapynan qoldaý bar», – deidi ol.
