Memleket basshysy búgin, 2025 jyly 7 qańtarda otandyq biznes ókilderimen bolǵan kezdesýde Úkimet usynǵan qosymsha qun salyǵy boiynsha mólsherleme tym joǵary ekenin aityp, bul máseleni taǵy da pysyqtaýdy tapsyrdy. Bul neni bildiredi? Qosymsha qun salyǵy óspeýi múmkin be? Bul saýaldarǵa qarjyger-maman Andei Chebatorev jaýap berdi, dep jazady Dalanews.kz.
Qosymsha qun salyǵy tóńiregindegi qyzý talqy
"Aitqanym aidai keldi. Bári shýlasyp, "sońǵy sheshim" sekildi qabyldaǵan 20 paiyz túpkilikti toqtam bolmai shyqty. Muny men Úkimettiń keńeitilgen otyrysynan soń birden jazǵan bolatynmyn. Búgin Prezident Úkimet usynǵan mólsherleme shynymen de tym joǵary ekenin málimdep, bul oiymdy taǵy rastady", dep jazdy maman jelide.
Prezidenttiń aitqany neni bildiredi?
"Bul "saýdalasý kezeńi" áli júrip jatyr degendi bildiredi. Sarapshylardyń keń aýqymdy tobyn tarta otyryp, mundai "saýda" biznes pen Úkimettiń arasyndaǵy júrýi tiis ári solai bolýy da kerek, óitkeni álemde aqyl-esi durys eshqandai biznes kez kelgen salyqtyń ósýine qýana qoimaidy. Salyq kodeksi — árqashan kelisimniń, ymyranyń qujaty: bir jaǵynda salyq tóleýdi unatpaityndar (bul qalypty qubylys, álemde eshkim salyq tóleýdi jaqtyrmaidy), ekinshi jaǵynda sol salyqty mektep, jol, jalaqy, járdemaqy jáne damý jobalaryna jumsaityndar turǵan".
Taǵy neni talqylaý kerek?
"Bárin. Salyq reformasy, ázirge tek ortaq tujyrymdamalyq deńgeide jariialandy, naqty qujattar men egjei-tegjeili esep-qisaptar áli kórinbedi. Sondyqtan da sońǵy kúnderi jýrnalisterge osy taqyrypta pikir bildirmei, tartyna turdym, sebebi áli egjei-tegjeili qujat paida bolǵan joq. Tipti, sarapshylar keńesinde de tek jalpy slaidtar kórsetildi. Parlamentke engiziletin sońǵy qujatty kútip, sony talqylaǵan jón", - deidi ol.
Kópshilik narazylyǵynyń "paidasyn tigizdi" me?
"Iá de, joq ta. Árine, jariialanǵan jazbalar men "qorqynyshty stsenariiler" sipatyndaǵy boljamdar áser etken bolýy yqtimal. Biraq bul arada mynany umytpaý kerek: kez kelgen salyqtyń eki sheti bar. Al ekinshi jaǵy, menińshe, taǵy eleýsiz qalyp, durys aitylmai jatyr. Úkimet óz is-áreketin neǵurlym ashyq ári anyq túsindirýi kerek. Bul jaǵyn Ilon Masktan úirengenderi jón bolar edi", - deidi Chebotarev.
Endi ne bolmaq?
Mamannyń aitýynsha, saýdalasý kezeńi jalǵasady. Ymyraǵa kelý kerek, biraq fiskaldy sharalardy qatańdatý jaiyn tizgindeý múmkin emes. Bári de Qazaqstan úshin tómen salyq dáýiriniń kúni ótkenin durys túsinýi kerek. Bul jaqsy ma, jaman ba, ony ýaqyt kórsetedi, ázirge bul jai ǵana fakt. Áleýmettik memleket retinde ári qarai tómen salyq mólsherlemesimen ómir súrý múmkin emes ekeni haq.
Buǵan deiin Memleket basshysynyń otandyq biznes ókilderimen kezskenin jazǵan bolatynbyz. Prezident Úkimet usynǵan qosymsha qun salyǵy boiynsha mólsherleme tym joǵary dep sanaidy.
