Qoǵam qaıratkeri Muhtar Taıjan saýda-oıyn ortalyqtary sekildi qoǵamdyq oryndarda tek sheteldik jáne reseılik ánderdiń qoıylýyna baılanysty alańdaýshylyq bildirip, qazaq mýzykasy týraly zań qabyldaýdy usyndy, - dep habarlaıdy baistars.kz saıty.

Bul týraly ol Facebook áleýmettik jelisindegi paraqshasynda jazdy. "Astana qalasynyń bıligine bir suraǵym bar: qoǵamdyq oryndarda qazaq mýzykasy nege joq? Kelýshilerdiń 80-90%-y qazaqtar, birde-bir qazaq áni joq!"- delingen Muhtar Taıjannyń jazbasynda.

Qoǵam qaıratkeriniń aıtýynsha, qazaq estradasyna kóz juma qarap, tek reseılik nemese sheteldik ánderdi qoıý halyqty zombıge aınaldyrý eken.

"Men barlyq qoǵamdyq oryndarda, sýpermarketterde, moldarda, kınoteatrlarda, shańǵy, kónkı tebetin jerlerde, stadıondarda qazaq mýzykasy, qazaq estradasy kem degende 80% ýaqytty alýy úshin zań qabyldaýdy usynamyn. Áset Isekeshev, atalǵan máselege nazar aýdarýyńyzdy suraımyn!", - deıdi Muhtar Taıjan.