24 mamyrda Almaty qalasynyń ákimi Erbolat Dosaev qyzmetinen bosatylyp, onyń ornyna Túrkistan oblysynyń burynǵy ákimi ári Prezident Ákimshiligi basshysynyń birinshi orynbasary Darhan Satybaldy taǵaiyndaldy. Dalanews.kz saityna pikir bildirgen saiasattanýshy Qazybek Maigeldinov bul taǵaiyndaýdy jai kadrlyq ózgeris emes, ortalyq biliktiń iri megapoliske baqylaýyn kúsheitýiniń belgisi dep baǵalady.
"Jaqynda bolǵan aýys-túiiske keletin bolsaq, aitalyq, Darhan Satybaldy elimizdiń ekonomikalyq draiveri bolyp esepteletin Almaty qalasynyń ákimi bolyp taǵaiyndaldy. Satybaldynyń buǵan deiin Túrkistan oblysynda infraqurylymdyq jobalardy júzege asyrýda jinaǵan tájiribesi bar. Ol — ierarhiialyq basqarý júiesi ornyqqan óńirde jumys istegen, jergilikti jáne ortalyq bilik qurylymdarynda ysylǵan tulǵa. Sonymen qatar Prezident Ákimshiliginde jaýapty qyzmet atqarǵandyqtan, ortalyq elitamen tyǵyz bailanysy bar kadr", - deidi ol.
Onyń sózinshe, Almaty – respýblikalyq mańyzy bar qala ǵana emes, sondai-aq túrli ideia men narazylyqtar jii baiqalatyn, protestik kóńil kúii basym ortalyq.
"Almaty — qarapaiym qurylymdy qabyldai qoimaityn qala. Munda qoǵamdyq suranys kúrdeli ári kópqyrly. Bul — saiasi oqiǵalardyń epitsentri, Qańtar oqiǵasy dál osy qalada bastalǵanyn umytpaý kerek. Sol sebepti Almaty qalasyna ákim bolý — qarapaiym ákimdik qyzmet emes, saiasi jaýapkershiligi asa joǵary mindet", - dep qosty ol.
Saiasattanýshy Satybaldynyń bul laýazymǵa kelýi birneshe deńgeidegi mánge ie ekenin jetkizdi.
"Birinshiden, onyń beiimdelý qabileti sheshýshi faktor bolmaq. Almaty — Túrkistan emes. Munda tek basqarý emes, tyńdaý, kelisý, qoǵammen áriptestik ornatý mańyzdy. Qala halqy ártúrli áleýmettik toptardan quralǵan, saiasi belsendiligi joǵary, kez kelgen ózgeriske ún qatyp otyrady. Osy turǵydan kelgende, ákimniń basqarý stili inkliýzivti bolýǵa tiis.
Ekinshiden, bul taǵaiyndaý elitalyq balanstyń ózgerýin bildiredi. Satybaldy — ońtústik aimaqtyq elitanyń ókili. Al Almaty — dástúrli túrde ortalyq elita yqpalyndaǵy qala. Mundai taǵaiyndaý — Prezidenttiń aimaqtyq elitaǵa senim bildirýiniń, sonymen qatar saiasi tranzit jaǵdaiynda elitalar arasyndaǵy konsensýsty qaita qurýdyń bir kórinisi", - deidi ol.
Sarapshy eki ákimniń basqarý stilin de salystyryp ótti.
"Burynǵy ákim Erbolat Dosaev tehnokrat retinde tanyldy. Ol sheshimderdi ekonomikalyq esepke súiene otyryp qabyldaityn, joǵarydan tómenge baǵyttalǵan basqarý júiesiniń ókili edi. Ulttyq ekonomika ministri, Ulttyq bank tóraǵasy bolǵan tájiribesi onyń bilik stiline de áser etti. Qańtar oqiǵasynan keiin ol Almatyny ekonomikalyq turǵydan turaqtandyrý úshin keldi. Onyń basqarýynda qarjylyq ratsionalizm basym boldy. Dosaev halyqpen kezdesýler ótkizýge tyrysty, alaida bul dialog kóbine formaldy sipatta qaldy. Bálkim, Almatyda formatty ózgertý qajet shyǵar. Iaǵni tek zaldarda nemese jabyq kabinetterde emes, qalanyń ár aýdanyna shyǵyp, tikelei dialog ornatý kerek. Mysaly, Talǵar aýdany ákiminiń jumysy – osyǵan úlgi bola alady. Almaty – kólemi úlken, infraqurylymy kúrdeli qala. Sondyqtan ákimniń giperaktivti, ashyq stilge kóshýi qajet.
Prezidenttiń "halyq únine qulaq asatyn memleket" qaǵidasyn júzege asyrý úshin ashyq bailanys kerek. Almaty turǵyndary – belsendi. Olar qala keńistigindegi kez kelgen ózgeriske ún qatady. Sonyń ishinde infraqurylym men kógaldandyrý máselelerine qatysty burynnan úlken narazylyqtar bolǵan. Baibek, Saǵyntaev, Dosaev tusyndaǵy birqatar jobalar qoǵamdyq narazylyq týdyrdy. Sondyqtan kez kelgen sheshim tek ákimshilik buiryqpen emes, ashyq dialogpen, qoǵamdyq kelisimmen qabyldanýy kerek", - deidi ol.
Aitýynsha, Túrkistanda jol, gazdandyrý, týrizm men qurylys salalaryn damytýǵa úles qosqan ákim endi Almaty syndy kúrdeli megapoliste de osy tájiribesin qoldanýǵa tiis.
"Alaida megapolis deńgeiindegi mindetter áldeqaida aýqymdy. Qalada kólik reformasy ózekti: metro jelilerin kóbeitý, jolairyqtar salý, kólik keptelisterin azaitý qajet. Bul — kezinde Tasmaǵambetov kótergen, keiin nazardan tys qalǵan másele", - deidi ol.
Onyń sózinshe, qoǵamdyq keńesterdiń jumysyn qaita formattaý qajet.
"Qoǵamdyq keńes – belsendi bolǵanymen, áli de bolsa ákimdikpen bailanysy tereńdei túsýi tiis. Almatynyń segiz aýdany jáne onyń mańyndaǵy eldi mekender jyl saiyn ósip keledi. Boraldai, Talǵar baǵytynda jańa aýdandar paida bolýda. Bul — injenerlik infraqurylymǵa túsetin júktemeni eseleidi. Demek, qurylys pen qala keńistigin damytýda strategiialyq kózqaras qajet.
Qurylys máselesine kelsek, qala ishinde tyǵyz qurylys jalǵasyp jatyr. Buǵan da strategiialyq kózqaras qajet. Sebebi almatylyqtar kez kelgen qurylysqa qatysty óte sezimtal. Sondyqtan qaladaǵy kez kelgen sheshim – qoǵamdyq kelisimmen, aqparattyq túsindirýmen qatar júrýi kerek. Almaty halqy kez kelgen qurylysqa óte sezimtal qaraidy", - dep qosty ol.
Saiasattanýshy Satybaldynyń kelýi — ortalyq biliktiń Almatydaǵy baqylaýdy kúsheitýiniń belgisi dep sanaidy.
"Bul, bir jaǵynan, Qańtar oqiǵasynyń qaitalanbaýyna jol bermeý, ekinshi jaǵynan – saiasi turaqtylyqty qamtamasyz etý úshin jasalǵan qadam.
Resmi emes turǵyda atalǵan taǵaiyndaý — elitalyq kelisimdi qaita qurý áreketi. Prezident qazirgi tranzit kezeńinde ózine senimdi kadrlardy tek ortalyqta emes, aimaqtarda da ornyqtyryp jatyr. Bul – bilik qurylymyndaǵy yqpal kartasyn qaita syzýdyń, senimdi tulǵalar arqyly aimaqtardy baqylaýǵa alýdyń belgisi.
Qorytyndylai kelgende, Satybaldy úshin Almaty — úlken synaq alańy. Bul — Túrkistan emes. Munda tek basqarý emes, tyńdaý men kelisý, seriktestik pen senim qurý — negizgi talap. Ortalyq bilik bul qalada tolyq baqylaý ornatqysy keledi. Sebebi Almaty — áleýmettik impýlstyń qainar kózi. Al jańa ákim – osy protsestiń dińgegine ainalýy tiis. Onyń tabysy — tek ákim retindegi jumysy emes, qoǵammen ózara senim ornatý deńgeiine bailanysty baǵalanady", - dep qorytyndylady saiasattanýshy.
