Qaraǵandy oblysy Sátbaev qalasynda bes jasar balany zorlady dep kúdikke ilingen 62 jastaǵy er adam 6 qazanda tergeý izoliatorynan óli kúiinde tabyldy. Bul aqparatty aimaqtyń qylmystyq-atqarý júiesi departamenti rastady.
- Jedel járdem brigadasy adam ólimi bolǵanyn rastady. Ázirge tolyq emes aqparat boiynsha kúdikti sýitsid jasaǵan bolýy múmkin. Tekserý kezinde máiitten dene jaraqaty tabylǵan joq. Fakt sotqa deiingi tergeý amaldarynyń biryńǵai reestrinde tirkeldi. [Tergeý izoliatoryna] Qaraǵandy politsiiasy basqarmasynyń tergeý toby keldi. Qylmystyq-atqarý júiesi departamenti qyzmettik tekseris taǵaiyndady, - dedi Qaraǵandy oblystyq qylmystyq-atqarý júiesi departamentiniń baspasóz qyzmeti Azattyq tilshisine.
24 shildege qaraǵan túni Sátbaevta júzdegen azamat kóshege shyǵyp, "páterinde 5 jasar balany zorlamaq bolǵan" er adamdy qolǵa tapsyrýdy talap etken edi. Turǵyndar "kishkentai qyzdy ustap otyrǵan" kúdiktiniń páteriniń ainalasyna jinalyp, birneshe jigit terezeni shaǵyp, ishke enbek bolǵan. Jinalǵandar oqiǵa ornyna kelgen politseiden kúdiktini qolǵa tapsyrýdy talap etken. Keiinirek kúshtik qurylymdar kúdiktige politsei formasyn kigizip, úiden alyp shyqqanyn aitqan.
Ondaǵan adam politsiia ǵimaratyna qarai jyljyp, qyzmettik kólikterdi shaqqan, avtobýsty órtegen. Tek tańǵa qarai bilik qaladaǵy jaǵdaidy baqylaýǵa alǵan.
Keiinirek osy oqiǵa boiynsha birneshe adamnyń ustalyp, qamalǵany belgili boldy. Politsiia aqparatynsha, olar buzaqylyq jasaǵan. Tergeý amaldarynyń aiaqtalǵany habarlanbady.
Al "bala zorlady" dep kúdikke ilingen er adam 26 shildede qamaýǵa alynǵan. Politsiia onyń áreketi "adam urlaý" jáne "bala zorlaý" baby boiynsha qarastyrylatynyn aitqan. Kishkentai qyzdy aýrýhanada teksergennen keiin ata-anasyna tapsyrǵan. Olar qyzyn tabýǵa kómektesken eriktilerge alǵys aityp, internet qoldanýshylardy qyzynyń sýretin jelide tarata bermeýge jáne oqiǵany qaita-qaita talqylai bermeýge shaqyrǵan.
Sátbaevtaǵy oqiǵadan keiin qoǵamda pedofilderge jazany kúsheitý qajettigi aityldy.
