Qaraǵandy oblysy Sátbaev qalasynda 5 jasar qyzdy "urlady" jáne "zorlady" dep kúdikke ilingen 62 jastaǵy er adam qamaýǵa alyndy.
Kúdiktiniń eki aiǵa qamalǵanyn Azattyq tilshisine Sátbaev qalalyq sotynyń qyzmetkeri habarlady. Politsiia ázirge túsinikteme bermedi.
24 shildege qaraǵan túni turǵyndardyń biri páterinde kishkentai qyzdy ustap otyr degen aqparat shyqqan soń Sátbaevta júzden astam adam kóshege shyǵyp, kúdiktini qolǵa tapsyrýdy talap etken edi. Buǵan deiin ishki ister ministrligi sol kezde keibir azamattardyń "buzaqylyq" jasaǵanyn, birneshe qylmystyq is qozǵalǵanyn aitqan.
Tártipsizdikke bailanysty qansha adamnyń ustalǵany jáne qansha shyǵyn kelgeni resmi túrde aitylǵan joq. Politsiia men ákimdik únsiz.
Ótken jumada bilik halyq tolqýy kezinde "esh kinási joq adamdardyń" shyǵynǵa ushyraǵanyn, biraq naqty qandai múliktiń búlingenin aitpaǵan. Sátbaev qalasynan túsirilgen videolarda politsiianyń qyzmet kólikteriniń búlingeni, politsiia ǵimaraty janyndaǵy qoqys tógetin orynnyń órtengeni kórinedi.
24 shildege qaraǵan túni Qaraǵandy oblysy Sátbaev qalasynda joǵalǵan qyzdyń qai páterde ekeni anyqtalǵan kezde ondaǵan adam kúdiktiniń páteriniń mańyna jinalǵan. Birneshe jigit kúdikti páter terezesin syndyryp, ishke kirmek bolǵan. Turǵyndar oqiǵa ornyna kelgen politseilerden kúdiktini jazalaý úshin ony qolǵa tapsyrýdy suraǵan.
Jergilikti bilik pen politsiianyń habarlaýynsha, aýrýhanada tekserilgen 5 jasar qyz qazir ata-anasynyń janynda.
26 shildede jergilikti aqparat quraldarynda kishkentai qyzdyń ata-anasynyń málimdemesi jariialandy. Onda málimdeme avtorlary balany tabýǵa kómektesken eriktilerge alǵys aitqan. Buǵan qosa qoldanýshylardan qyzynyń sýretin jáne oqiǵa týraly internette jalǵan aqparat taratpaýdy suraǵan. Ata-analar sonymen birge qarjylai kómekke zárý emestigin, ózderi úshin aqsha jinaý qajet emes ekenin aitqan.
