Atyraý oblysynyń qylmystyq ister jónindegi mamandandyrylǵan aýdanaralyq sotynda bir otbasynyń tórt múshesin óltirý isi boiynsha sot protsesi jalǵasyp jatyr. Aiyptalýshylar oryndyǵynda qaza tapqandardyń kúieý balasy Sultan Sársemáliev otyr, dep habarlaidy dalanews.kz.
NewTimes.kz málimetinshe, Sársemálievke qatysty jańa aiyptaý aktisinde jábirlenýshi tarap burynǵy otbasylyq qarym-qatynasqa bailanysty derekterdi de iske qosýdy suraǵan. Aqbaiannyń advokaty Shynar Nurmuratqyzy oqiǵaǵa deiin erli-zaiyptylar arasynda janjal bolǵanyn aitty.
Qorǵaýshynyń sózinshe, otbasyndaǵy kelispeýshilikke Sársemálievtiń áieliniń kózine shóp salýy sebep bolǵan. Osydan keiin 2022 jyly Aqbaian Muqanǵalieva ajyrasýǵa ótinish berip, keiin olardyń nekesi resmi túrde buzylǵan.
Sot otyrysynda sýdia Sársemáliev pen Muqanǵalieva arasyndaǵy nekeni buzý týraly 2022 jylǵy sot sheshimin oqyp berdi. Qujatta Aqbaiannyń opasyzdyq jasaǵan adamǵa sezimi qalmaǵanyn jáne onymen birge ómir súrýdi jalǵastyrǵysy kelmeitinin kórsetkeni aitylǵan.
Sársemáliev sol kezde sottyń nekeni buzý týraly sheshimimen kelisken. Ótinish qaralǵannan keiin erli-zaiyptylar resmi túrde ajyrasqan.
Sot materialdarynda taraptar arasynda ortaq múlikti bólýge qatysty daý bolmaǵany da kórsetilgen.
Jańa aiyptaý aktisinde bir epizodtyń quqyqtyq baǵasy ózgergeni belgili boldy. Buǵan deiin is materialdarynda alaiaqtyq týraly aitylsa, endi ol urlyq babyna qaita saralanǵan.
Jábirlenýshi tarap qylmysqa deiingi jaǵdailar isti qaraý úshin mańyzdy dep sanaidy. Sondyqtan olar osy derekterdiń sot materialdarynda kórsetilýi qajet degen ustanymda.
Sonymen qatar jańa aiyptaý aktisinen buǵan deiin jeńildetetin mán-jai retinde kórsetilgen keibir derekter alynyp tastalǵan.
