Jetisý oblysy Sarqan qalasynyń mańyndaǵy sharýa qojalyqtarynyń birinde maily zyǵyr ósirile bastady. Egis naýqanynyń barysymen jumys sapary aiasynda aýdanǵa barǵan oblys ákimi Beibit Isabaev tanysty,- dep habarlaidy Dalanews.kz
«Ǵalym» sharýa qojalyǵynda biyl 100 ga maily zyǵyr egildi. Dándi júgeri, soia, arpa, bidai ósirýge beiimdelgen bul sharýashylyq osy daqyldy biyl alǵash ret seýip otyr.
- Zyǵyrdyń agrotehnikasyn, tuqym naryǵyn zerttei otyryp, biz «ortasha Lirina» sortyn otyrǵyzdyq. Bul óte ónimdi, quramynda maiy kóp sort. Ár gektarynan 20-25 ts alamyz, al maidyń mólsheri keminde 50% bolady dep kútip otyrmyz. Aimaq aýmaǵynda maily daqyldardy qaita óńdeitin birneshe kásiporyn bar ekenin eskersek, shikizatty ótkizýde qiyndyq týyndamaidy dep oilaimyz. Aldyn ala kelisimder jasasyp ta qoidyq. Sonymen qatar zyǵyr dándi daqyldardyń aýyspaly egisine de paidaly, - dep atap ótti ShQ basshysy Ǵalym Rahmetqaliev.
Aýdannyń Almaly aýylyndaǵy «Jumaǵali» sharýa qojalyǵynyń egistikterinde de kóktemgi dala jumystary qarqyndy júrip jatyr. Sharýashylyqta egistik te, mal ósirý de qolǵa alynǵan. Munda 537 bas iri qara, 600 bas usaq mal jáne 630 jylqy ósirilip otyr.
- Biyl biz jazdyq arpa, kúnbaǵys jáne birinshi ret qant qyzylshasyn septik. Ázirge qyzylshany 38 gektardan bastap otyrmyz. Kelesi jyly ulǵaitý josparymyzda bar, óitkeni bul tabysty daqyl, ári osy daqyldy ósirýshilerge memlekettik qoldaý kórsetiledi. «Konviza Smart» joǵary ónimdi tuqymyn seýip jatyrmyz. Sharýashylyǵymyzda qajetti aýyl sharýashylyǵy tehnikasy bar, degenmen ótken jyly aýdanda servistik-daiyndaý ortalyǵyna arnap satyp alynǵan zamanaýi tehnika bizge úlken kómek boldy, osy tehnikalardyń qyzmetterin paidalanyp otyrmyz. Mysaly, pnevmatikalyq sepkishtiń artyqshylyǵy sol, avtopiloty bolǵandyqtan onyń jyldamdyǵy jaqsy, onymen kúndiz de, túnde de jumys istei alasyz. Osy tehnikanyń kómegimen bir kúnde 30 ga jer egýge bolady, - deidi ShQ basshysy Egemen Jumaǵali.
Osy oraida Beibit Isabaev Jetisý oblysynda óndiriletin aýyl sharýashylyǵy shikizatynyń 65%-y óńirde qaita óńdeletinin, sonyń ishinde qant óndirisine erekshe kóńil bólinip otyrǵanyn atap ótti.
- Mysaly, ótken jyly oblystyń 5 aýdanynda 8 jańa servistik-daiyndaý ortalyǵy quryldy, sonyń arqasynda 30 sharýa qojalyǵy qant qyzylshasyn óndirýge qajetti jalpy somasy 2,5 mlrd.teńgege 62 birlik tehnika satyp alýǵa múmkindik aldy. Aýyl sharýashylyǵyn damytý úshin, ónimdilikti arttyrý úshin ozyq tehnologiialardy meńgerý kerek. Buǵan zamanaýi aýyl sharýashylyǵy tehnikasy da úlken yqpal etedi, - dedi oblys ákimi.
Ótken jyly Sarqan aýdanynda 3 jańa servistik-daiyndaý ortalyǵy quryldy, olarǵa 4 sepkish, 3 qyzylsha kombainy jáne 3 pálek jinaityn mashinasy satyp alyndy. Qazir aýdanda 6 SDO jumys isteidi, onda 30-ǵa jýyq aýyl sharýashylyǵy tehnikasy bar. Aýdanda qant qyzylshasyn ósirýdiń agrotehnologiiasy damyǵanyn eskersek, ótken jyly tátti túbir alańy 2 esege ulǵaityldy, al biyl taǵy 900 gektarǵa artady. Osylaisha, Sarqan aýdanynda bul daqyldyń alqaby 3,8 myń gektar bolmaq.
Jalpy osy jyly oblystyń agroónerkásiptik keshenin damytýǵa 45 mlrd.teńge bólindi, onyń 27 mlrd. teńgesi nemese 59% – sýbsidiia.
