Túrkistan oblysy, Saryaǵash aýdany, Jylǵa eldi mekeninde kezekte turǵan 11 azamatqa jer telimderi tabystaldy. Aldaǵy ýaqytta jer telimderiniń qujattary daıyn bolýyna qaraı 500-ge jýyq azamatqa turǵyn úı salý úshin jer beriletin bolady, – dep habarlaıdy Dalanews.kz Túrkistan oblysy ákiminiń baspasóz qyzmetine silteme jasap.

Jer alǵan azamattardyń bári birneshe jyldan beri jer kezegine turǵandar. Sebebi aýdan kóleminde 2012 jyldan osy kúnge deıin eshbir eldi mekende jer telimderi berilmegen. Osyǵan oraı atalǵan sharaǵa aýdan ákimi Muhıt Otarshıev arnaıy qatysyp, jer ıelerine quqyq berýshi qujattaryn tabystady.

– Búgingi tańda aýdan aýmaǵynda ınfraqurylymdy damytý kezek kúttirmeıtin máselelerdiń birine aınalyp otyr. Sebebi turǵyndardyń jeke turǵyn úılerin salý úshin jer telimin bólý jónindegi suranystary jyldan-jylǵa ósip keledi. Sonymen qatar turǵyn úı salý úshin jer telimi bólingenimen zań talaptaryna sáıkes, ınfraqurylymmen qamtamasyz etilmegen jer telimderi tabystalmaıdy.

Sondyqtan, osy máselelerdi sheshý maqsatynda Jylǵa aýyldyq okrýginde ınjenerlik-kommýnıkasıalyq ınfraqurylymdy damytýda birqatar jumystar atqarylyp, qazir sol jer telimderin tabystaǵaly otyrmyz. Qutty qonys salynyp, osy jer úlken ortalyqqa aınalsyn! – dedi aýdan basshysy.

Jer telimin alǵan aýyl turǵyny Jarqynbek Qanaev halyqtyń kókeıkesti máseleleriniń biri sheshimin tapqanyna qýanyshty ekendigin jetkizdi. Kópten bergi armanynyń oryndalǵanyn aıtyp, aýdan basshysyna alǵysyn bildirdi. Sonymen qatar aýyl qarıalary da elge qyzmet etip júrgen azamattarǵa aq batasyn berip, jaqsy ister jalǵasyn taba bersin degen izgi tilekterin jetkizdi.

Jylǵa eldi mekeninde «Aýyl – el besigi» baǵdarlamasy aıasynda 42 gektar aýmaqty ınfraqurylymmen qamtamasyz etý úshin respýblıkalyq búdjetten qarjy bólinip, 16 shaqyrym elektr jelileri jáne 4 dana transformator ornatyldy. Sondaı-aq, uzyndyǵy 6 shaqyrymnan asa kóshelerge shaǵal tóseý jumystary júrgizildi.

Aıta ketsek, búgingi tańda aýdanda 18000-nan astam azamat jer kezeginde tur. Turǵyn úı qurylysy úshin jer telimin surap jazǵan ótinishter sanyn azaıtý maqsatynda Derbisek eldi mekenindegi 70 ga jańa qonystaný aımaǵyn qajetti ınfraqurylymmen qamtamasyz etý úshin jobalyq-smetalyq qujattamasy ázirlenip, qurylys-montaj jumystaryna qarjy bóldirý úshin oblystyq búdjetke usynylǵan. Qajetti qarjy bólingen jaǵdaıda atalǵan aımaq ınfraqurylymmen qamtamasyz etilip, jer telimderi kezekte turǵan azamattarǵa beriledi.