Jer alǵan azamattardyń bári birneshe jyldan beri jer kezegine turǵandar. Sebebi aýdan kóleminde 2012 jyldan osy kúnge deiin eshbir eldi mekende jer telimderi berilmegen. Osyǵan orai atalǵan sharaǵa aýdan ákimi Muhit Otarshiev arnaiy qatysyp, jer ielerine quqyq berýshi qujattaryn tabystady.
– Búgingi tańda aýdan aýmaǵynda infraqurylymdy damytý kezek kúttirmeitin máselelerdiń birine ainalyp otyr. Sebebi turǵyndardyń jeke turǵyn úilerin salý úshin jer telimin bólý jónindegi suranystary jyldan-jylǵa ósip keledi. Sonymen qatar turǵyn úi salý úshin jer telimi bólingenimen zań talaptaryna sáikes, infraqurylymmen qamtamasyz etilmegen jer telimderi tabystalmaidy.
Sondyqtan, osy máselelerdi sheshý maqsatynda Jylǵa aýyldyq okrýginde injenerlik-kommýnikatsiialyq infraqurylymdy damytýda birqatar jumystar atqarylyp, qazir sol jer telimderin tabystaǵaly otyrmyz. Qutty qonys salynyp, osy jer úlken ortalyqqa ainalsyn! – dedi aýdan basshysy.
Jylǵa eldi mekeninde «Aýyl – el besigi» baǵdarlamasy aiasynda 42 gektar aýmaqty infraqurylymmen qamtamasyz etý úshin respýblikalyq biýdjetten qarjy bólinip, 16 shaqyrym elektr jelileri jáne 4 dana transformator ornatyldy. Sondai-aq, uzyndyǵy 6 shaqyrymnan asa kóshelerge shaǵal tóseý jumystary júrgizildi.
Aita ketsek, búgingi tańda aýdanda 18000-nan astam azamat jer kezeginde tur. Turǵyn úi qurylysy úshin jer telimin surap jazǵan ótinishter sanyn azaitý maqsatynda Derbisek eldi mekenindegi 70 ga jańa qonystaný aimaǵyn qajetti infraqurylymmen qamtamasyz etý úshin jobalyq-smetalyq qujattamasy ázirlenip, qurylys-montaj jumystaryna qarjy bóldirý úshin oblystyq biýdjetke usynylǵan. Qajetti qarjy bólingen jaǵdaida atalǵan aimaq infraqurylymmen qamtamasyz etilip, jer telimderi kezekte turǵan azamattarǵa beriledi.
