Saryaǵash qalasynda ornalasqan №1 M.Áýezov atyndaǵy mektep-gimnaziiasynyń 100 jyldyq mereitoiyna arnalǵan «Ǵasyr belesindegi bilim ordasy» atty saltanatty shara ótti. Saltanatty jiynǵa ardager ustazdar, mektep túlekteri, mektep oqýshylary, ustazdar, ata-analar jáne arnaiy shaqyrylǵan qonaqtar qatysty, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Aldymen qazaq ádebietiniń klassigi M. Áýezovtiń eskertkishine gúl shoqtaryn qoiý rásimi ótti. Bilim ordasynyń úzdik túlekteriniń biri, Qazaqstan Respýblikasy Premer-Ministriniń orynbasary Tamara Dúisenova merekelik jiynǵa arnaiy qatysyp, jinalǵan jurtshylyqty quttyqtady. Sonymen qatar Túrkistan oblysy ákiminiń orynbasary Beisenbai Tájibaev bilim ordasynyń ujymyn quttyqtap, ulaǵatty ustazdardy bilim jolyndaǵy eren eńbekteri úshin oblys ákiminiń alǵys hattarymen marapattady.
Saltanatty shara aýdandyq mádeniet úiinde jalǵasyp, aýdan ákimi Arman Abdýllaev ǵasyrlyq tarihy bar bilim berý ordasynyń ujymyn quttyqtap, ustazdyq joldaǵy ozattardy marapattady. Merekelik shara barysynda mekteptiń túlegi, pedagogika ǵylymdarynyń doktory, professor, «Táshenev ýniversiteti» AQ Basqarma basshysy Ońalbai Aiashev ta birqatar ustazdy marapattap, baǵaly syilyqtar tabystady.
Bilim ordasynyń qabyrǵasynda elge belgili túlekter bilim alyp, elge qyzmet etýde. Jalpy bir ǵasyrlyq tarihy bar, qara shańyraq atanǵan №1 M. Áýezov atyndaǵy mektep-gimnaziiasynda búginde 1733 oqýshy bilim alyp, olarǵa 175 pedagog bilim berýde.
