«Saryaǵash» shipajaiy: káriz júieleri jańartylyp jatyr
Málimetterge sáikes, 1984 jyly iske qosylyp, búgingi tańǵa ábden tozyǵy jetip qaita-qurylymdaýdy talap etetin beket «Saryaǵash» emdeý ońaltý kesheni JShS-niń teńgeriminde, negizgi qýaty táýligine 1000 tekshe metrge eseptelgen. Al qazirgi tańda, Kókterek kentindegi halyq sanynyń ulǵaiýyna jáne shipajailar sany 20-dan asa artýyna bailanysty káriz sýlarynyń kólemi burynǵysynan birneshe esege artyp, apatty jaǵdaida jumys júrgizip keledi.
Osyǵan bailanysty bul atalǵan tozyǵy jetken káriz júiesi men shaiyndy sýlardy tazartý beketin qaita qurylymdaýǵa jáne qýatyn arttyrýǵa «Saryaǵash» emdeý ońaltý kesheni JShS-i óz qarajat esebinen jalpy somasy 28 mln. teńgege jobalyq-smetalyq qujatyn (PSD) ázirlep, memlekettik saraptamanyń oń qorytyndysyn aldy. Joba boiynsha qýattylyǵy táýligine 3100 tekshe metrge deiin káriz sýlaryn qabyldap-tazartý múmkindigine ie. Joba quny 1 164,008 mln.teńgeni quraidy.
Qazirgi tańǵa kásipkerlik nysandarynda jumys istep jatqan azamattarǵa túsindirý jumystary júrgizilýde. Kókterek kýrorty aýmaǵyn damytý baǵdarlamasynda saýda-sattyq jasaýshylarǵa «Saryaǵash» emdeý ońaltý kesheni aýmaǵynan arnaiy jer qarastyrylýda. Degenmen búgingi kúnge káriz júiesi men shaiyndy sýlardy tazartý beketin qaita qurylymdaýǵa jasalynǵan jobanyń iske asyrý protsedýrasy biraz ýaqytty talap etedi. Sondyqtan káriz júiesiniń jobasy iske asqanǵa deiin saýda-sattyqpen shuǵyldanatyn tulǵalarǵa jańa zamaýi saýda oryndarymen qamtamasyz etý josparlanýda.
Jalpy, aýdanda mineraldyq jáne termaldyq sýlardy paidalaný arqyly saýyqtyrý týrizmin damytý maqsatynda «Saryaǵash» jańa kýrorttyq qalashyǵynyń qurylysy boiynsha birqatar jobalardy iske asyrý josparlanyp otyr. «Saryaǵash» jańa kýrort aýmaǵyn jalpy jer kólemi 530 gektarǵa ulǵaitý josparlanyp, jer ýchaskelerine túgendeý jumystary júrgizilýde. Aýdandyq kásipkerlik bólimine týrizm salasyn damytý baǵytynda búgingi kúnge Kókterek kenti aýmaǵyndaǵy jer ýchaskeleriniń nysanaly maqsatyna sai iske asyrylatyn 10 joba usynylyp, jobalyq smetalyq qujattary ázirlenýde.
