Quqyq qorǵaýshy jáne zańger Inga Imanbai Erbaian Muhtarǵa qatysty qylmystyq is pen sotqa qatysty saýaldarǵa jaýap berdi, dep habarlaidy Dalanews.kz Ulysmedia.kz-ke siltep.
"Dál qazir biz Almaty qalasyndaǵy áskeri-tergeý basqarmasynyń aldynda turmyz. Men jańa ǵana Erbaian Muhtardyń isi boiynsha tergeýshige jolyǵyp shyqtym. Osy tusta anyqtap aita ketkim keletini – sot áli bolǵan joq. Erbaiannyń isi tergeý satysynda.
Dál qazir Erbaiannyń jaǵdaiyna bailanysty eki qylmystyq is tergelip jatyr. Ol áskerde bolǵan jaǵdaiǵa bailanysty jáne aýrýhanadaǵy dárigerlerdiń áreketine bailanysty. Keibir saraptamalardyń qorytyndysy shyqqan. Kei saraptama jańadan taǵaiyndaldy. Sondyqtan dál qazir sot qashan bolatynyn aitqan joq. Mindetti túrde tergeý barysynda sottyń qashan bolatyny anyqtalǵan kezde habar beremin", dedi Inga Imanbai.
Eske salaiyq, byltyr jeltoqsan aiynda Ulttyq ulan jaýyngeri Erbaian Muhtar komaǵa tústi.
QR IIM Ulttyq ulanynyń baspasóz qyzmeti sarbazdyń densaýlyǵyna qatysty resmi málimdeme jasaǵan bolatyn.
Ulttyq ulannyń habarlaýynsha, qatardaǵy Erbaian Muhtardyń bas jaraqatyn alý faktisi boiynsha QR QK 440-baby 4-tarmaǵynyń 3-bóligine sai qylmystyq is qozǵalǵan. Bul jerde áskeri qyzmetshiler arasyndaǵy ózara qarym-qatynastardyń jarǵylyq erejelerin buza otyryp, densaýlyqqa aýyr ziian keltirgeni másele bolyp otyr.
Atalǵan oqiǵadan soń Erbaian Muhtarǵa Ystanbulǵa jol tartty. Munda oǵan sátti ota jasaldy.
Bul jańalyqty belgili zańger Inga Imanbai Facebook paraqshasynda jazǵan bolatyn.
“Jelide Erbaiannyń jaǵdaiyn surap, habarlasyp jatqan aǵaiynǵa myń alǵys. Qazir Erbaiannyń jaǵdaiy birqalypty, Stambulda emin jalǵastyryp jatyr. Birinshi turǵan foto búgin jasaldy. Ekinshi foto Stambulǵa kelgen kezde basyna jasalǵan otadan keiingi kezi. Qudaiǵa shúkir ota sátti jasalyp, endi reabilitatsiialyq em-shara, emdik dene shynyqtyrý protsedýralary bastaldy”, - dedi ol.
Aitýynsha, qalpyna kelý biraz ýaqytty talap etedi.
“Oǵan daiynbyz. Ary qarai Erbaiannyń jigeri men dárigerlerdiń kásibiligine senemiz. Erbaianymyzdy izdep, surap, niettes bolǵandaryńyzǵa myń alǵys. Qazirge jańalyǵymyz osy. Aitarlyqtai ózgeris, jaqsy jańalyǵymyz bolsa mindetti túrde Sizdermen bólisemiz”, - dep jazdy Inga Imanbai.
