Əkim esh jumys jasamai, qyzmetkerlerin qańǵytyp jibergen kompaniia basshysyn synǵa aldy.
– Jumysty jaqsartý, jumysshylar jalaqysyn kóterýge qatysty kelisimshartqa otyrdyq. Kelisimdegi 10 bólimniń 6-ýy oryndalmaǵan. Kompaniia basshysyna birneshe ret eskertý jasalyndy. Ótken jylǵy shyǵyn 1 milliardtan asqan. Shyǵyndardy taldaý kerek. Kelisim-shartty oryndamasa, onda moinyna nege alady? Úsh jaqty kelisimniń 60 paiyzy oryndalmaǵan. Bizde «daǵdarys» degen jaqsy syltaý bar. Daǵdarys tek sizderge keldi me? Qalǵan mekemeler jolyn taýyp jatyr. Burǵylaý jumysyna qarap otyrýǵa bolmaidy. Eger bul kompaniia osyndai qiyndyqtar týǵyzatyn bolsa, bizge kerek emes. Aqtóbe bul kompaniiasyz qulap qalmaidy. Ekonomikalyq jaǵdaiyn jaqsartpasa, jabý kerek. Biz jylda osy kompaniiadan qysqarǵan adamdardy jumyspen qamtamasyz etip otyrmyz. Kompaniia jumysshy jaǵdaiyn jaqsartpasa, bizge kerek emes, – dedi oblys əkimi.
– Qazaqstandyq jumysshylar qysqartylyp jatqanda, nege shetelden úshinshi, tórtinshi dərejeli jumysshylar əkelinedi? Muny qoiý kerek. Eger Aqtóbede jumys jasaǵylaryń kelse, jumysshylardy qysqartýdy qoiyńyzdar, – dedi oblys basshysy.
Munai kompaniiasynyń basshysy da, ekonomikalyq jaǵdaiyna jaýap beretin mamandary da əkim qoiǵan suraqtarǵa naqty jaýap bere almai bastaryn qasyp, kúmiljip qaldy.
"Jumysshylar jalaqysy 7 paiyzǵa tómendegen, əleýmettik tólemaqy azaiǵan. Ótken jyldyń 12 aiynda 6 ret osy kompaniia məselesi qaralǵan. Kompaniia basshysynyń jumysynda esh nətije joq. Jumysshylardy qysqartý toqtatylsyn" degen talabymyz da oryndalmai otyr. Sońǵy eki jylda jumysshylar sany eki esege qysqartylǵan. Bulai bolmaidy", – dedi Saparbaev.
Esterińizge salsaq, "Uly Qabyrǵa" munai kompaniiasynyń basshysy ótken jyly Berdibek Saparbaevtan qazaq tilinde aýdarmashy ustamaǵany úshin sóz estigen bolatyn.
Búgingi jiynda qytai kompaniiasynyń basshysy sóz aldynda baiandamasyn orys jəne qazaq tilinde jasai alatynyn aitty.
"Qazaqsha sóileiin dep tursyz ba?", – degen Berdibek Saparbaev tańdanysyn jasyra alǵan joq. Chjan Tsziýn eki tilde de aýdarmashy daiyndap qoiǵanyn aityp, qyzmetkerleriniń aldynda kúlkige qaldy.
