Aqtóbedegi qytaı kompanıasynyń basshysy Berdibek Saparbaevtan óz kompanıasyn jappaýyn jalynyp surady dep habarlaıdy NUR.KZ tilshisi. Qytaıdan kelgen 3-shi dárejeli qyzmetkerlerin ustap, qazaqstandyq jumysshylardy qysqartqan Chjan Szún jaýap bere almaı sasty. Búgin Aqtóbe oblysynyń ákimi Berdibek Saparbaev «Uly Qabyrǵa» munaı kompanıasynyń bas dırektory Chjan Szún jasaǵan jumys esebin tyńdaýǵa bardy. Ótken jyly qurdymǵa ketkeli turǵandyǵy aıtylǵan kompanıa taǵy  bir jyl  ishinde eshteńe jasamaǵan bolyp shyqty.

Ákim esh jumys jasamaı, qyzmetkerlerin qańǵytyp jibergen kompanıa basshysyn synǵa aldy.

– Jumysty jaqsartý, jumysshylar jalaqysyn kóterýge qatysty kelisimshartqa otyrdyq. Kelisimdegi 10 bólimniń 6-ýy oryndalmaǵan. Kompanıa basshysyna birneshe ret eskertý jasalyndy. Ótken jylǵy shyǵyn 1 mıllıardtan asqan. Shyǵyndardy taldaý kerek. Kelisim-shartty oryndamasa,  onda moınyna nege alady? Úsh jaqty kelisimniń 60 paıyzy oryndalmaǵan. Bizde «daǵdarys» degen jaqsy syltaý bar. Daǵdarys tek sizderge keldi me? Qalǵan mekemeler jolyn taýyp jatyr. Burǵylaý jumysyna qarap otyrýǵa bolmaıdy. Eger bul kompanıa osyndaı qıyndyqtar týǵyzatyn bolsa, bizge kerek emes. Aqtóbe bul kompanıasyz qulap qalmaıdy. Ekonomıkalyq jaǵdaıyn jaqsartpasa, jabý kerek. Biz jylda osy kompanıadan qysqarǵan adamdardy jumyspen qamtamasyz etip otyrmyz. Kompanıa jumysshy jaǵdaıyn jaqsartpasa, bizge kerek emes, – dedi oblys ákimi.

Oblys ákimi naqty suraqtarǵa jaýap bere almaı sasqalaqtap, kúmiljip qalǵan qytaı kompanıasynyń basshysyna eskertý jasady. Kompanıada jumysshylardy qysqartý eki esege azaıǵan. Myńdaǵan qazaqstandyq munaıshylar qysqartýǵa ushyrap jatqanda, kompanıada úshinshi dárejeli qytaılar áli jumys jasap júrgen bolyp shyqty.

– Qazaqstandyq jumysshylar qysqartylyp jatqanda, nege shetelden úshinshi, tórtinshi dárejeli jumysshylar ákelinedi? Muny qoıý kerek.  Eger Aqtóbede jumys jasaǵylaryń kelse, jumysshylardy qysqartýdy qoıyńyzdar, – dedi oblys basshysy.

Munaı kompanıasynyń basshysy da, ekonomıkalyq jaǵdaıyna jaýap beretin mamandary da ákim qoıǵan suraqtarǵa naqty jaýap bere almaı bastaryn qasyp, kúmiljip qaldy.

"Jumysshylar jalaqysy 7 paıyzǵa tómendegen, áleýmettik tólemaqy azaıǵan. Ótken jyldyń 12 aıynda 6 ret osy kompanıa máselesi qaralǵan. Kompanıa basshysynyń jumysynda esh nátıje joq. Jumysshylardy qysqartý toqtatylsyn" degen talabymyz da oryndalmaı otyr. Sońǵy eki jylda jumysshylar sany eki esege qysqartylǵan.  Bulaı bolmaıdy", – dedi Saparbaev.

Esterińizge salsaq, "Uly Qabyrǵa" munaı kompanıasynyń basshysy ótken jyly Berdibek Saparbaevtan qazaq tilinde aýdarmashy ustamaǵany úshin sóz estigen bolatyn.

Búgingi jıynda qytaı kompanıasynyń basshysy sóz aldynda baıandamasyn orys jáne qazaq tilinde jasaı alatynyn aıtty.

"Qazaqsha sóıleıin dep tursyz ba?", – degen Berdibek Saparbaev tańdanysyn jasyra alǵan joq. Chjan Szún eki tilde de aýdarmashy daıyndap qoıǵanyn aıtyp, qyzmetkerleriniń aldynda kúlkige qaldy.