اكىم ەش جۇمىس جاساماي، قىزمەتكەرلەرىن قاڭعىتىپ جىبەرگەن كومپانيا باسشىسىن سىنعا الدى.
– جۇمىستى جاقسارتۋ، جۇمىسشىلار جالاقىسىن كوتەرۋگە قاتىستى كەلىسىمشارتقا وتىردىق. كەلىسىمدەگى 10 ءبولىمنىڭ 6-ۋى ورىندالماعان. كومپانيا باسشىسىنا بىرنەشە رەت ەسكەرتۋ جاسالىندى. وتكەن جىلعى شىعىن 1 ميللياردتان اسقان. شىعىنداردى تالداۋ كەرەك. كەلىسىم-شارتتى ورىنداماسا، وندا موينىنا نەگە الادى؟ ءۇش جاقتى كەلىسىمنىڭ 60 پايىزى ورىندالماعان. بىزدە «داعدارىس» دەگەن جاقسى سىلتاۋ بار. داعدارىس تەك سىزدەرگە كەلدى مە؟ قالعان مەكەمەلەر جولىن تاۋىپ جاتىر. بۇرعىلاۋ جۇمىسىنا قاراپ وتىرۋعا بولمايدى. ەگەر بۇل كومپانيا وسىنداي قيىندىقتار تۋعىزاتىن بولسا، بىزگە كەرەك ەمەس. اقتوبە بۇل كومپانياسىز قۇلاپ قالمايدى. ەكونوميكالىق جاعدايىن جاقسارتپاسا، جابۋ كەرەك. ءبىز جىلدا وسى كومپانيادان قىسقارعان ادامداردى جۇمىسپەن قامتاماسىز ەتىپ وتىرمىز. كومپانيا جۇمىسشى جاعدايىن جاقسارتپاسا، بىزگە كەرەك ەمەس، – دەدى وبلىس اكىمى.
وبلىس اكىمى ناقتى سۇراقتارعا جاۋاپ بەرە الماي ساسقالاقتاپ، كۇمىلجىپ قالعان جۇڭگو كومپانياسىنىڭ باسشىسىنا ەسكەرتۋ جاسادى. كومپانيادا جۇمىسشىلاردى قىسقارتۋ ەكى ەسەگە ازايعان. مىڭداعان قازاقستاندىق مۇنايشىلار قىسقارتۋعا ۇشىراپ جاتقاندا، كومپانيادا ءۇشىنشى دارەجەلى قىتايلار ءالى جۇمىس جاساپ جۇرگەن بولىپ شىقتى.
– قازاقستاندىق جۇمىسشىلار قىسقارتىلىپ جاتقاندا، نەگە شەتەلدەن ءۇشىنشى، ءتورتىنشى دارەجەلى جۇمىسشىلار اكەلىنەدى؟ مۇنى قويۋ كەرەك. ەگەر اقتوبەدە جۇمىس جاساعىلارىڭ كەلسە، جۇمىسشىلاردى قىسقارتۋدى قويىڭىزدار، – دەدى وبلىس باسشىسى.
مۇناي كومپانياسىنىڭ باسشىسى دا، ەكونوميكالىق جاعدايىنا جاۋاپ بەرەتىن ماماندارى دا اكىم قويعان سۇراقتارعا ناقتى جاۋاپ بەرە الماي باستارىن قاسىپ، كۇمىلجىپ قالدى.
"جۇمىسشىلار جالاقىسى 7 پايىزعا تومەندەگەن، الەۋمەتتىك تولەماقى ازايعان. وتكەن جىلدىڭ 12 ايىندا 6 رەت وسى كومپانيا ماسەلەسى قارالعان. كومپانيا باسشىسىنىڭ جۇمىسىندا ەش ناتيجە جوق. جۇمىسشىلاردى قىسقارتۋ توقتاتىلسىن" دەگەن تالابىمىز دا ورىندالماي وتىر. سوڭعى ەكى جىلدا جۇمىسشىلار سانى ەكى ەسەگە قىسقارتىلعان. بۇلاي بولمايدى"، – دەدى ساپاربايەۆ.
ەستەرىڭىزگە سالساق، "ۇلى قابىرعا" مۇناي كومپانياسىنىڭ باسشىسى وتكەن جىلى بەردىبەك ساپاربايەۆتان قازاق تىلىندە اۋدارماشى ۇستاماعانى ءۇشىن ءسوز ەستىگەن بولاتىن.
بۇگىنگى جيىندا جۇڭگو كومپانياسىنىڭ باسشىسى ءسوز الدىندا بايانداماسىن ورىس جانە قازاق تىلىندە جاساي الاتىنىن ايتتى.
"قازاقشا سويلەيىن دەپ تۇرسىز با؟"، – دەگەن بەردىبەك ساپاربايەۆ تاڭدانىسىن جاسىرا العان جوق. چجان سزيۋن ەكى تىلدە دە اۋدارماشى دايىنداپ قويعانىن ايتىپ، قىزمەتكەرلەرىنىڭ الدىندا كۇلكىگە قالدى.
