Qazaqstanda mektepter men balabaqshalarǵa jasalatyn sanitarlyq tekserýlerdiń tártibi ózgeredi. Májiliste qaralyp jatqan túzetýler jazalaýdy emes, balalardyń qaýipsizdigi men taǵam sapasyna baqylaýdy kúsheitýdi kózdeidi. Bul týraly depýtat Ashat Aimaǵambetov málimdedi, dep habarlaidy Dalanews.kz.
“Mektep, kolledj ben balabaqshalarǵa jasalatyn SES tekserýlerdiń jazalaýǵa baǵyttalǵan mehanizmin ózgertemiz, direktorlardy qorǵaimyz jáne ashanalardaǵy taǵam sapasy men balalarǵa jasalǵan jaǵdaiǵa baqylaýdy kúsheitemiz dep aittyq. Búgin biz ázirlegen arnaiy túzetýler Májiliste qaralady”, — dedi ol.
Depýtattyń sózinshe, buǵan deiingi júie kóbine formaldylyqqa ainalyp, direktorlar ózderi yqpal ete almaityn máseleler úshin aiyppul tólep kelgen.
"Mysaly, synyptardyń tolyp ketýi nemese úsh aýysymdyq oqý úshin direktordy jazalaý ádiletsiz", – dedi ol.
Aimaǵambetov jańa ózgeristerdiń negizgi tustaryn atap ótti. Onyń aitýynsha, qarjylyq shyǵyndy qajet etetin kemshilikter úshin direktor emes, ákimdik nemese ýákiletti organ jaýap beredi. Sonymen qatar mektep ashanalary men jazǵy lagerlerge tekserýler aldyn ala eskertýsiz júrgiziledi. Alǵashqy tekserý aiyppulsyz ótedi, ol tek monitoring formatynda júrgizilip, naqty usynystar beriledi.
“Basty maqsat – jazalaý emes, jaǵdaidy túzetý jáne kómektesý. Balalardyń ómiri men densaýlyǵyna qaýip tóngen jaǵdaida ǵana qatań sharalar qoldanylady: ýaqytsha jabý nemese qyzmetkerlerdi jumystan shettetý”, – dedi depýtat.
Sonymen qatar onyń aitýynsha, mekteptik tamaq jetkizýshilerdiń biryńǵai reestri jasalyp, adal emes merdigerler júieden shettetiledi.
“Endi sanitarlyq baqylaý jazalaý quraly emes, balalarymyzdyń densaýlyǵy men bolashaǵyn qorǵaýdyń senimdi tetigine ainalady. Mektepter, balabaqshalar men kolledjder ózderi yqpal ete almaityn máseleler úshin aiyppul tólemeidi”, – dep túiindedi Aimaǵambetov.
