قازاقستاندا مەكتەپتەر مەن بالاباقشالارعا جاسالاتىن سانيتارلىق تەكسەرۋلەردىڭ ءتارتىبى وزگەرەدى. ماجىلىستە قارالىپ جاتقان تۇزەتۋلەر جازالاۋدى ەمەس، بالالاردىڭ قاۋىپسىزدىگى مەن تاعام ساپاسىنا باقىلاۋدى كۇشەيتۋدى كوزدەيدى. بۇل تۋرالى دەپۋتات اسحات ايماعامبەتوۆ مالىمدەدى، دەپ حابارلايدى Dalanews.kz.
“مەكتەپ، كوللەدج بەن بالاباقشالارعا جاسالاتىن سەس تەكسەرۋلەردىڭ جازالاۋعا باعىتتالعان مەحانيزمىن وزگەرتەمىز، ديرەكتورلاردى قورعايمىز جانە اسحانالارداعى تاعام ساپاسى مەن بالالارعا جاسالعان جاعدايعا باقىلاۋدى كۇشەيتەمىز دەپ ايتتىق. بۇگىن ءبىز ازىرلەگەن ارنايى تۇزەتۋلەر ماجىلىستە قارالادى”، — دەدى ول.
دەپۋتاتتىڭ سوزىنشە، بۇعان دەيىنگى جۇيە كوبىنە فورمالدىلىققا اينالىپ، ديرەكتورلار وزدەرى ىقپال ەتە المايتىن ماسەلەلەر ءۇشىن ايىپپۇل تولەپ كەلگەن.
"مىسالى، سىنىپتاردىڭ تولىپ كەتۋى نەمەسە ءۇش اۋىسىمدىق وقۋ ءۇشىن ديرەكتوردى جازالاۋ ادىلەتسىز"، – دەدى ول.
ايماعامبەتوۆ جاڭا وزگەرىستەردىڭ نەگىزگى تۇستارىن اتاپ ءوتتى. ونىڭ ايتۋىنشا، قارجىلىق شىعىندى قاجەت ەتەتىن كەمشىلىكتەر ءۇشىن ديرەكتور ەمەس، اكىمدىك نەمەسە ۋاكىلەتتى ورگان جاۋاپ بەرەدى. سونىمەن قاتار مەكتەپ اسحانالارى مەن جازعى لاگەرلەرگە تەكسەرۋلەر الدىن الا ەسكەرتۋسىز جۇرگىزىلەدى. العاشقى تەكسەرۋ ايىپپۇلسىز وتەدى، ول تەك مونيتورينگ فورماتىندا جۇرگىزىلىپ، ناقتى ۇسىنىستار بەرىلەدى.
“باستى ماقسات – جازالاۋ ەمەس، جاعدايدى تۇزەتۋ جانە كومەكتەسۋ. بالالاردىڭ ءومىرى مەن دەنساۋلىعىنا ءقاۋىپ تونگەن جاعدايدا عانا قاتاڭ شارالار قولدانىلادى: ۋاقىتشا جابۋ نەمەسە قىزمەتكەرلەردى جۇمىستان شەتتەتۋ”، – دەدى دەپۋتات.
سونىمەن قاتار ونىڭ ايتۋىنشا، مەكتەپتىك تاماق جەتكىزۋشىلەردىڭ ءبىرىڭعاي رەەسترى جاسالىپ، ادال ەمەس مەردىگەرلەر جۇيەدەن شەتتەتىلەدى.
“ەندى سانيتارلىق باقىلاۋ جازالاۋ قۇرالى ەمەس، بالالارىمىزدىڭ دەنساۋلىعى مەن بولاشاعىن قورعاۋدىڭ سەنىمدى تەتىگىنە اينالادى. مەكتەپتەر، بالاباقشالار مەن كوللەدجدەر وزدەرى ىقپال ەتە المايتىن ماسەلەلەر ءۇشىن ايىپپۇل تولەمەيدى”، – دەپ تۇيىندەدى ايماعامبەتوۆ.
