«Samuryq-Qazyna» qorynyń 2026 jyldyń alǵashqy alty aiyndaǵy negizgi qarjylyq kórsetkishteri ótken jyldyń sáikes kezeńimen salystyrǵanda ósti, dep habarlaidy dalanews.kz.
Astanada «Samuryq-Qazyna» AQ Qoǵamdyq keńesiniń qarjylyq nátijelerge arnalǵan otyrysy ótti. Jiynǵa Qoǵamdyq keńes tóraǵasy Bolat Jámishev jetekshilik etti.
«Samuryq-Qazyna» AQ Ekonomika jáne qarjy jónindegi basqarýshy direktory Aidar Rysqulovtyń aitýynsha, 2026 jyldyń qańtar-maýsym ailarynda qordyń túsimi ótken jyldyń osy kezeńimen salystyrǵanda 21%-ǵa artqan.
Osy kezeńde taza paida 18%-ǵa, al EBITDA kórsetkishi 15%-ǵa ósken. Sonymen qatar qordyń birqatar óndiristik kórsetkishteri boiynsha da oń dinamika qalyptasqan. Atap aitqanda, ýran óndirý kólemi, júk ainalymy jáne tranzit kórsetkishteri artqan.
«Samuryq-Qazyna» aktivteriniń kólemi boiynsha álemdegi eń iri 21 táýelsiz ál-aýqat qorynyń qataryna kiredi. Bul SWFI-diń 2025 jylǵy reitingine sáikes keledi.
Qor aktivteriniń kólemi de turaqty ósip keledi. 2022 jyly bul kórsetkish 33,6 trln teńge bolsa, 2026 jyldyń birinshi jartyjyldyǵynyń qorytyndysynda 46,7 trln teńgege jetti. Osylaisha, sońǵy jyldary aktivter kólemi jyl saiyn orta eseppen 10%-ǵa ulǵaiǵan.
Aidar Rysqulovtyń málimetinshe, 2026 jyldyń qańtar-maýsym ailarynda qor aktivteriniń ósimi shamamen 5%-dy qurady. Bul kórsetkish qor aktivteriniń ortasha jyldyq ósý qarqynyna sáikes keledi.
Qordyń negizgi mindetteriniń biri – portfeldik kompaniialardyń qunyn jáne olardyń taza aktivterin odan ári arttyrý. Sonymen qatar «Samuryq-Qazyna» Qazaqstan ekonomikasyna tikelei sheteldik investitsiialar tartýǵa yqpal etýdi kózdeidi.
Qordyń qarjylyq turaqtylyǵy halyqaralyq kredittik reitingtermen de rastalady. Fitch Ratings «Samuryq-Qazynaǵa» BBB deńgeiindegi reiting berip, boljamyn «Turaqty» dep baǵalaǵan. Moody’s agenttigi qordyń reitingin Baa1 deńgeiinde saqtap, boljamyn «Turaqty» dep belgiledi.
