Joǵary aýditorlyq palata «Samuryq-Qazyna» AQ-daǵy aýditti aiaqtady, dep habarlaidy Dalanews.kz.
QR Joǵary aýditorlyq palatasy «Samuryq-Qazyna» AQ men onyń enshiles uiymdaryndaǵy memlekettik aktivterdiń paidalanylý tiimdiligine aýdit júrgizip, strategiialyq basqarý júiesin baǵalady.
Tekserý sharalary Qordyń korporativtik ortalyq retindegi qyzmetin, sondai-aq «Qazatomónerkásip», «Samruk-Kazyna Ondeu» jáne basqa da birqatar kompaniiany qamtydy. Jalpy 18 zańdy tulǵada aýdit júrgizildi, sonymen qatar Parlament depýtattary men qoǵam tarapynan kelip túsken saýaldar eskerildi.
2024 jyldyń qorytyndysy boiynsha Qordyń kompaniialar tobynyń kirisi 16,5 trln teńgeni, al holdingtiń kompaniialar tobynyń shoǵyrlandyrylǵan taza paidasy 2,4 trln teńgeni qurady.
Aýdit qamtyǵan kezeńde holding memleketke 2,37 trln teńge tólegen, onyń 779,9 mlrd teńgesi dividendter túrinde, 1,6 trln teńgesi aktivterdi básekelestik ortaǵa berý esebinen aýdaryldy.
Bul tólemderge qosymsha Qor taǵy 673 mlrd teńgege QR Prezidenti men Úkimetiniń tapsyrmalaryn iske asyrdy.
Sonymen birge aýditorlar Qordyń kompaniialar tobyndaǵy strategiialyq josparlaý men basqarýdaǵy kemshilikterdi anyqtady.
2018-2021 jyldarǵa arnalǵan Qordy transformatsiialaý baǵdarlamasynyń 8 kompaniiany sheteldik analogtardyń tiimdilik deńgeiine shyǵarý maqsaty oryndalmaǵan. Baǵdarlamadan túsken naqty paida kólemi 154,5 mlrd teńge, iaǵni josparlanǵan mólsherden eki ese tómen.
Qordaǵy korporativtik basqarý deńgeiiniń jetkiliksizdigi baiqaldy. Atap aitqanda, strategiialyq qujattardy tiisinshe ázirlemeý, josparly kórsetkishterdi tómendetý faktileri oryn alǵan, holdingtiń Damý josparynyń oryndalýyna baqylaýdy kúsheitý qajet.
7 aqparattyq júieniń ishinde Qor tek 4 júieni paidalanady. Basqarýshylyq esep júiesi (SAP BPC) durys jumys istemeidi, al birqatar kompaniia boiynsha qarjylyq esep qolmen júrgiziledi.
«Samuryq-Qazynada» ishki normativtik qujattardy júieleýge jetkilikti kóńil bólinbeidi. Olardyń shamamen 15%-y qoldanylmaidy, qaita qaraýdy nemese kúshin joiýdy talap etedi.
«Samuryq-Qazyna» AQ Direktorlar keńesi janyndaǵy 5 komitettiń 3-eýi (strategiia jónindegi, Transformatsiia baǵdarlamasynyń oryndalýyn baqylaý jónindegi, mamandandyrylǵan komitet) jumys istemeidi. Al Qor Basqarmasy janyndaǵy 7 komitettiń 2024 jyldan beri 2-eýi (jańǵyrtý jáne turaqty damý jónindegi) jumys istemeidi.
Nátijesinde holdingtiń qurylymy tym kúrdeli kúige jetken. Qor tobyna 6 deńgeige bólingen 326 kompaniia kiredi. 2020-2024 jyldary Qor tobynda 23 belsendi emes kompaniia bolǵan, al 2024 jyldyń qorytyndysy boiynsha 41 kompaniia shyǵynmen aiaqtaǵan. Bul aktivter qurylymyn ońtailandyrýdyń jáne olardy tiimdi basqarýdyń mańyzdy áleýetin kórsetedi.
Sondai-aq investitsiialyq jobalardyń iske asyrylýyn baqylaýdy túbegeili kúsheitý qajet, sebebi 2020 jyldan 2024 jylǵy 30 qyrkúiekke deiin Qor tobynyń 175 jobasynyń tek 49-y ǵana aiaqtalǵan.
Jalpy aýdit qorytyndysy boiynsha:
351,8 mln teńge kóleminde qarjylyq buzýshylyqtar;
122,2 mlrd teńge somasynda tiimsiz josparlaý jáne qarajatty paidalaný faktileri anyqtaldy;
119 júielik kemshilik tirkeldi.
Birqatar material ákimshilik is qozǵaý úshin joldandy, al anyqtalǵan jekelegen buzýshylyqtar boiynsha materialdar quqyq qorǵaý organdaryna jiberildi.
