«Qazaqstan Respýblikasy Bas prokýratýrasynyń Cotqa deiingi tergep-tekserý qyzmeti S.Ábishke qatysty qylmystyq isti tergeýdi aiaqtaǵanyn habarlaimyn. QR Qylmystyq kodeksiniń 362-babynyń 4-bóligi boiynsha is qozǵalyp, sotqa joldandy», – delingen atalǵan qyzmettiń basshysy Rizabek Ojarovtyń agenttikke bergen resmi jaýabynda.
Osy qylmystyq is aiasynda Samat Ábish aýyr saldarǵa ákep soqtyrǵan biligin jáne qyzmettik ókilettigin asyra paidalandy degen kúdikke ilingen.
Kúdiktige qatysty eshqaida ketpeý týraly bultartpaý sharasy qabyldanǵan. Ol qazir Qazaqstan aýmaǵynan shyqpaǵan.
«Qylmystyq iste memlekettik qupiialardy qamtyǵan málimetter bar ekenin eskere otyryp, sotqa deiingi tergep-tekserý derekteri jariia etilmeidi», – dep atalyp ótken habarlamada.
2022 jylǵy 17 qańtarda Memleket basshysy Qasym-Jomart Toqaev Samat Ábishti Qazaqstan Respýblikasy Ulttyq qaýipsizdik komiteti tóraǵasynyń birinshi orynbasary qyzmetinen bosatqan bolatyn.
Buǵan deiin UQK 5-departamentiniń burynǵy bastyǵy Rýslan Ysqaqov Qańtar oqiǵasy kezinde ózine Nursultan Nazarbaevtyń nemere inisi Samat Ábish buiryq bergenin málimdegen.
Polkovnik Ysqaqov ózinen jaýap alǵannan keiin bir jarym jyldan soń onyń jaýaptary qupiialandyrylǵanyn aitqan. Onyń sózinshe, bul qadamǵa tergeý organdary Nursultan Nazarbaevtyń nemere inisi – UQK tóraǵasynyń burynǵy orynbasary Samat Ábishtiń rólin jasyryp qalý úshin jasaǵan.
"Olar Ábishtiń buiryǵyn oryndaǵanymdy aitpaýym úshin osyǵan baryp otyr", – degen edi Rýslan Ysqaqov sotta sóilegen sózinde.
