ۇلتتىق قاۋىپسىزدىك كوميتەتى ءتوراعاسىنىڭ بۇرىنعى ءبىرىنشى ورىنباسارى سامات ابىشكە قاتىستى قىلمىستىق ءىس بويىنشا تەرگەۋ اياقتالدى. ءىس سوتقا جىبەرىلدى.

«قازاقستان رەسپۋبليكاسى باس پروكۋراتۋراسىنىڭ Cوتقا دەيىنگى تەرگەپ-تەكسەرۋ قىزمەتى س.ابىشكە قاتىستى قىلمىستىق ءىستى تەرگەۋدى اياقتاعانىن حابارلايمىن. ق ر قىلمىستىق كودەكسىنىڭ 362-بابىنىڭ 4-بولىگى بويىنشا ءىس قوزعالىپ، سوتقا جولداندى»، – دەلىنگەن اتالعان قىزمەتتىڭ باسشىسى ريزابەك وجاروۆتىڭ اگەنتتىككە بەرگەن رەسمي جاۋابىندا.

وسى قىلمىستىق ءىس اياسىندا سامات ءابىش اۋىر سالدارعا اكەپ سوقتىرعان بيلىگىن جانە قىزمەتتىك وكىلەتتىگىن اسىرا پايدالاندى دەگەن كۇدىككە ىلىنگەن.

كۇدىكتىگە قاتىستى ەشقايدا كەتپەۋ تۋرالى بۇلتارتپاۋ شاراسى قابىلدانعان. ول ءقازىر قازاقستان اۋماعىنان شىقپاعان.

«قىلمىستىق ىستە مەملەكەتتىك قۇپيالاردى قامتىعان مالىمەتتەر بار ەكەنىن ەسكەرە وتىرىپ، سوتقا دەيىنگى تەرگەپ-تەكسەرۋ دەرەكتەرى جاريا ەتىلمەيدى»، – دەپ اتالىپ وتكەن حابارلامادا.

2022 جىلعى 17 قاڭتاردا مەملەكەت باسشىسى قاسىم-جومارت توقايەۆ سامات ءابىشتى قازاقستان رەسپۋبليكاسى ۇلتتىق قاۋىپسىزدىك كوميتەتى ءتوراعاسىنىڭ ءبىرىنشى ورىنباسارى قىزمەتىنەن بوساتقان بولاتىن.

بۇعان دەيىن ۇقك 5-دەپارتامەنتىنىڭ بۇرىنعى باستىعى رۋسلان ىسقاقوۆ قاڭتار وقيعاسى كەزىندە وزىنە نۇرسۇلتان نازاربايەۆتىڭ نەمەرە ءىنىسى سامات ءابىش بۇيرىق بەرگەنىن مالىمدەگەن.

پولكوۆنيك ىسقاقوۆ وزىنەن جاۋاپ العاننان كەيىن ءبىر جارىم جىلدان سوڭ ونىڭ جاۋاپتارى قۇپيالاندىرىلعانىن ايتقان. ونىڭ سوزىنشە، بۇل قادامعا تەرگەۋ ورگاندارى نۇرسۇلتان نازاربايەۆتىڭ نەمەرە ءىنىسى – ۇقك ءتوراعاسىنىڭ بۇرىنعى ورىنباسارى سامات ءابىشتىڭ ءرولىن جاسىرىپ قالۋ ءۇشىن جاساعان.

"ولار ءابىشتىڭ بۇيرىعىن ورىنداعانىمدى ايتپاۋىم ءۇشىن وسىعان بارىپ وتىر"، – دەگەن ەدى رۋسلان ىسقاقوۆ سوتتا سويلەگەن سوزىندە.