Resmi málimet boiynsha, Qazaqstanda zeinet jasyndaǵy 2,25 millionǵa jýyq azamat bar.
«Bul – belgili bir problemalary men qajettilikteri bar adamdar. Belsendi jáne aqyl-oiy tolysqan jandar. Meniń maqsatym – amerikalyqtar nemese qytailar siiaqty Qazaqstandaǵy osy jastaǵy azamattardyń Eýropadaǵy murajailardy kórý úshin demalysqa shyǵýyna nemese Afrikaǵa safarige barýyna múmkindik jasaý. Barlyq azamattar úshin laiyqty jáne qaýipsiz qarttyq – meniń armanym», – deidi Saltanat Tursynbekova.
Halyqtyń osy tobynyń tilek-usynysyn tyńdaý úshin ol kún saiyn 60-65-ke jýyq zeinetker sportpen ainalysýǵa, ústel oiyndaryn oinaýǵa jáne jai ǵana áńgimelesýge keletin «Belsendi uzaq ómir súrý ortalyǵyna» bardy.
Ol ortalyqqa kelýshilermen birge sport jattyǵýlaryn jasap, áńgimelesip, tipti bi biledi. Mundaǵy áielderdiń densaýlyq jaǵdaiy jaqsy. Olar sporttyń kez kelgen túrin erkin meńgerip, qiyn degen jattyǵýlardy op-ońai oryndaidy.
Degenmen, jaqsy jaqtaryna qaramastan, olardy alańdatatyn bir jait bar. Ol zeinetaqynyń azdyǵy, memleket tarapynan jaqsy áleýmettik qoldaýdyń joqtyǵy, keibireýin baspananyń tapshylyǵy, keibireýin jalǵyzdyq muńaitady.
Saltanat Tursynbekova ortalyq músheleriniń barlyq aryz-shaǵymdary men ótinishterin tyńdap, zeinetkerlerge kómektesý jáne turmysyn jaqsartý maqsatynda eń tómengi jalaqy men kúnkóris deńgeiin arttyrýdy (zeinetaqy jinaqtary men járdemaqylar), qiyn ómirlik jaǵdaiǵa tap bolǵan otbasylardyń qaryzdaryn joiý, ÚEU men eriktilerdi tarta otyryp, qoljetimdi baǵadaǵy ónimder men taýarlarmen áleýmettik dúkender jelisin qurý, áleýmettik turǵyn úi jáne infraqurylym salý josparyn ortaǵa saldy.
Eske salaiyq, úmitker Túrkistan oblysynda 1100-ge jýyq adam jumys isteitin Kentaý transformator zaýytynda da bolyp, «Ǵizzat» múgedekter qoǵamdastyǵy motivatsiialyq ortalyǵyna, sondai-aq ÚEU úiine baryp, óńirdiń máselelerin talqylady.
