رەسمي مالىمەت بويىنشا، قازاقستاندا زەينەت جاسىنداعى 2،25 ميلليونعا جۋىق ازامات بار.
«بۇل – بەلگىلى ءبىر پروبلەمالارى مەن قاجەتتىلىكتەرى بار ادامدار. بەلسەندى جانە اقىل-ويى تولىسقان جاندار. مەنىڭ ماقساتىم – امەريكالىقتار نەمەسە قىتايلار سياقتى قازاقستانداعى وسى جاستاعى ازاماتتاردىڭ ەۋروپاداعى مۇراجايلاردى كورۋ ءۇشىن دەمالىسقا شىعۋىنا نەمەسە افريكاعا سافاريگە بارۋىنا مۇمكىندىك جاساۋ. بارلىق ازاماتتار ءۇشىن لايىقتى جانە ءقاۋىپسىز قارتتىق – مەنىڭ ارمانىم»، – دەيدى سالتانات تۇرسىنبەكوۆا.
حالىقتىڭ وسى توبىنىڭ تىلەك-ۇسىنىسىن تىڭداۋ ءۇشىن ول كۇن سايىن 60-65-كە جۋىق زەينەتكەر سپورتپەن اينالىسۋعا، ۇستەل ويىندارىن ويناۋعا جانە جاي عانا اڭگىمەلەسۋگە كەلەتىن «بەلسەندى ۇزاق ءومىر ءسۇرۋ ورتالىعىنا» باردى.
ول ورتالىققا كەلۋشىلەرمەن بىرگە سپورت جاتتىعۋلارىن جاساپ، اڭگىمەلەسىپ، ءتىپتى بي بيلەدى. مۇنداعى ايەلدەردىڭ دەنساۋلىق جاعدايى جاقسى. ولار سپورتتىڭ كەز كەلگەن ءتۇرىن ەركىن مەڭگەرىپ، قيىن دەگەن جاتتىعۋلاردى وپ-وڭاي ورىندايدى.
دەگەنمەن، جاقسى جاقتارىنا قاراماستان، ولاردى الاڭداتاتىن ءبىر جايت بار. ول زەينەتاقىنىڭ ازدىعى، مەملەكەت تاراپىنان جاقسى الەۋمەتتىك قولداۋدىڭ جوقتىعى، كەيبىرەۋىن باسپانانىڭ تاپشىلىعى، كەيبىرەۋىن جالعىزدىق مۇڭايتادى.
سالتانات تۇرسىنبەكوۆا ورتالىق مۇشەلەرىنىڭ بارلىق ارىز-شاعىمدارى مەن وتىنىشتەرىن تىڭداپ، زەينەتكەرلەرگە كومەكتەسۋ جانە تۇرمىسىن جاقسارتۋ ماقساتىندا ەڭ تومەنگى جالاقى مەن كۇنكورىس دەڭگەيىن ارتتىرۋدى (زەينەتاقى جيناقتارى مەن جاردەماقىلار)، قيىن ومىرلىك جاعدايعا تاپ بولعان وتباسىلاردىڭ قارىزدارىن جويۋ، ۇەۇ مەن ەرىكتىلەردى تارتا وتىرىپ، قولجەتىمدى باعاداعى ونىمدەر مەن تاۋارلارمەن الەۋمەتتىك دۇكەندەر جەلىسىن قۇرۋ، الەۋمەتتىك تۇرعىن ءۇي جانە ينفراقۇرىلىم سالۋ جوسپارىن ورتاعا سالدى.
ەسكە سالايىق، ۇمىتكەر تۇركىستان وبلىسىندا 1100-گە جۋىق ادام جۇمىس ىستەيتىن كەنتاۋ ترانسفورماتور زاۋىتىندا دا بولىپ، «عيززات» مۇگەدەكتەر قوعامداستىعى موتيۆاسيالىق ورتالىعىنا، سونداي-اق ۇەۇ ۇيىنە بارىپ، ءوڭىردىڭ ماسەلەلەرىن تالقىلادى.
