"Qazirgi ýaqytta bizdi is boiynsha júrgizilgen barlyq saraptamalarmen tanystyrdy. Biraq biz qylmystyq istiń materialdaryn áli tolyq kórgen joqpyz. Meniń mundai isterde óte úlken tájiribem bar. Men buryn kisi óltirý isterimen ainalysqanmyn, biraq tipti sarapshylardyń tujyrymdary meni tań qaldyrdy. Men mundai qatygezdikti, salqynqandylyqty eshqashan kórgen emespin. Qazirgi ýaqytta Saltanattyń týystaryna degen qurmetpen ólimdi búge-shegesine deiin aita almaimyz. Taraptar is materialdarymen tanysyp, qorǵaý ótinishterin málimdegennen keiin sheshim qabyldaý úshin prokýratýraǵa jiberiletin bolady", – dedi ol.
Onyń aitýynsha, asa aýyr qylmys jasaǵany týraly habarlamaǵany úshin alty myń ailyq eseptik kórsetkishke deiingi mólsherde aiyppul salýǵa ne sol mólsherde túzeý jumystaryna tartylýǵa, alty jylǵa deiingi merzimge bas bostandyǵyn shekteýge ne sol merzimge bas bostandyǵynan aiyrý jazasy qoldanylmaq.
Osy sanattaǵy ister qoldanystaǵy qylmystyq is júrgizý zańnamasyna sáikes kisi óltirý jónindegi negizgi ispen birge sotqa jiberilmek. Eske salaiyq, burynǵy ekonomika ministri Qýandyq Bishimbaev Astanadaǵy meiramhanalardyń birinde áielin uryp óltirdi degen kúdikpen qamaýǵa alyndy.
Qaitys bolǵan Saltanat Núkenovanyń aǵasy Qairat Núkenov "Bishimbaevty aqtaýǵa tyrysqan" blogerlerdi aiyptai sóilep, eks-ministrdi týystary eshqashan keshirmeitinin málimdedi.
Qylmystyq iske prezident Qasym-Jomart Toqaev ta nazar aýdaryp, isti IIM basshylyǵyna erekshe baqylaýǵa alýdy tapsyrdy. Keiin eks-ministr Bishimbaevtyń ústinen «asa qatygezdikpen adam óltirý» baby boiynsha is qozǵalǵany belgili boldy.
