Maýsym aiynyń ortasynda Saltanat Núkenovanyń ólimine qatysty atyshýly istegi figýrant – Bahytjan Baijanovtyń jubaiy Joǵarǵy sotqa ótinish joldaǵan, dep habarlaidy Dalanews.kz.
"2025 jylǵy 19 maýsymda QR Joǵarǵy sotyna sottalýshy Bahytjan Baijanovtyń qorǵaýshysy Ainur Kúldeeva (Baijanovtyń jubaiy – avt.) sot aktilerin qaita qaraý týraly ótinishpen júgindi. Ótinishte qorǵaýshy 2025 jylǵy 23 sáýirde Astana qalasynyń qylmystyq ister jónindegi mamandandyrylǵan aýdanaralyq sotynyń qaýlysyn qaita qaraýdy suraǵan. Sol qaýlyda sot Baijanov pen onyń advokaty Ǵaziz Yntyqbaevtyń úkimdi oryndaý barysynda týyndaǵan túsiniksiz jaittar men kúmándi máselelerdi túsindirý týraly ótinishin qaraýsyz qaitarǵan", – delingen Joǵarǵy sottyń Informburo.kz resmi suraýyna bergen jaýabynda.
Joǵarǵy sot ótinishti keri qaitardy
24 maýsymda Ainur Kúldeevanyń ótinishi qanaǵattandyrylmai, keri qaitaryldy.
"Úkimdi oryndaýǵa qatysty máseleler boiynsha shyǵarylǵan qaýly kassatsiialyq tártipte shaǵymdanýǵa jáne narazylyq bildirýge jatpaidy", – dep túsindirdi Joǵarǵy sot.
Baijanov amnistiia boiynsha jaza merzimin qysqartýdy surady
Keiin, 9 shildede Bahytjan Baijanov Stepnogor aýdandyq sotyna amnistiia týraly zańǵa sáikes jaza merzimin qysqartý týraly ótinish túsirdi.
Baijanov Saltanat Núkenovanyń ólimine qatysty asa aýyr qylmysty – adam óltirýdi – aldyn ala ýaǵdalaspai jasyryp qalǵany úshin kináli dep tanylyp, 4 jylǵa bas bostandyǵynan aiyrylǵan edi.
Amnistiia týraly zańǵa sáikes, osy sanattaǵy qylmyspen sottalǵandarǵa jaza merzimin 1/5 bólikke qysqartý qarastyrylǵan. Bul shamamen 9 aiǵa teń.
Bahytjan Baijanov 2023 jyldyń 11 qarashasynan beri qamaýda otyr. Al úkim 2024 jyldyń 26 maýsymynda zańdy kúshine endi. Osy eki aralyqtaǵy ýaqyt bir jarym kún retinde esepteledi.
