ماۋسىم ايىنىڭ ورتاسىندا سالتانات نۇكەنوۆانىڭ ولىمىنە قاتىستى اتىشۋلى ىستەگى فيگۋرانت – باحىتجان بايجانوۆتىڭ جۇبايى جوعارعى سوتقا ءوتىنىش جولداعان، دەپ حابارلايدى Dalanews.kz.
"2025 جىلعى 19 ماۋسىمدا ق ر جوعارعى سوتىنا سوتتالۋشى باحىتجان بايجانوۆتىڭ قورعاۋشىسى اينۇر كۇلدەيەۆا (بايجانوۆتىڭ جۇبايى – اۆت.) سوت اكتىلەرىن قايتا قاراۋ تۋرالى وتىنىشپەن جۇگىندى. وتىنىشتە قورعاۋشى 2025 جىلعى 23 ساۋىردە استانا قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىنىڭ قاۋلىسىن قايتا قاراۋدى سۇراعان. سول قاۋلىدا سوت بايجانوۆ پەن ونىڭ ادۆوكاتى عازيز ىنتىقبايەۆتىڭ ۇكىمدى ورىنداۋ بارىسىندا تۋىنداعان تۇسىنىكسىز جايتتار مەن كۇماندى ماسەلەلەردى ءتۇسىندىرۋ تۋرالى ءوتىنىشىن قاراۋسىز قايتارعان"، – دەلىنگەن جوعارعى سوتتىڭ Informburo.kz رەسمي سۇراۋىنا بەرگەن جاۋابىندا.
جوعارعى سوت ءوتىنىشتى كەرى قايتاردى
24 ماۋسىمدا اينۇر كۇلدەيەۆانىڭ ءوتىنىشى قاناعاتتاندىرىلماي، كەرى قايتارىلدى.
"ۇكىمدى ورىنداۋعا قاتىستى ماسەلەلەر بويىنشا شىعارىلعان قاۋلى كاسساسيالىق تارتىپتە شاعىمدانۋعا جانە نارازىلىق بىلدىرۋگە جاتپايدى"، – دەپ ءتۇسىندىردى جوعارعى سوت.
بايجانوۆ امنيستيا بويىنشا جازا مەرزىمىن قىسقارتۋدى سۇرادى
كەيىن، 9 شىلدەدە باحىتجان بايجانوۆ ستەپنوگور اۋداندىق سوتىنا امنيستيا تۋرالى زاڭعا سايكەس جازا مەرزىمىن قىسقارتۋ تۋرالى ءوتىنىش ءتۇسىردى.
بايجانوۆ سالتانات نۇكەنوۆانىڭ ولىمىنە قاتىستى اسا اۋىر قىلمىستى – ادام ءولتىرۋدى – الدىن الا ۋاعدالاسپاي جاسىرىپ قالعانى ءۇشىن كىنالى دەپ تانىلىپ، 4 جىلعا باس بوستاندىعىنان ايىرىلعان ەدى.
امنيستيا تۋرالى زاڭعا سايكەس، وسى ساناتتاعى قىلمىسپەن سوتتالعاندارعا جازا مەرزىمىن 1/5 بولىككە قىسقارتۋ قاراستىرىلعان. بۇل شامامەن 9 ايعا تەڭ.
باحىتجان بايجانوۆ 2023 جىلدىڭ 11 قاراشاسىنان بەرى قاماۋدا وتىر. ال ۇكىم 2024 جىلدىڭ 26 ماۋسىمىندا زاڭدى كۇشىنە ەندى. وسى ەكى ارالىقتاعى ۋاقىت ءبىر جارىم كۇن رەتىندە ەسەپتەلەدى.
