Ulttyq quryltaıdyń ekonomıkalyq damý seksıasynda kásipker, quryltaı múshesi Syrymbek Taý nesıeniń joǵary paıyzdyq mólsherlemesine alańdaýshylyq bildirip, onyń shekti deńgeıin tómendetý qajettigin kóterdi. Sondaı-aq salyq tólemeıtin kásipkerlerge nesıe berýge tyıym salýdy usyndy, dep habarlaıdy Dalanews.kz.

“Ulttyq quryltaıdyń basty maqsaty – qoǵamda kóterilip jatqan ózekti máselelerdi Úkimetke tikeleı jetkizý. Sonymen qatarÚkimetpen birlesip jumys istep, halyqtyń usynystaryn Prezıdentke jetkizý”, – dedi ol.

Kásipkerdiń aıtýynsha, qazirgi mıkroqarjy uıymdary 46%-ǵa deıingi paıyzben nesıe berip otyr, bul – óte joǵary kórsetkish.

“Osyndaı joǵary mólsherlememen alynǵan nesıeni óteý halyq úshin múmkin emes. Kepildik nesıe de 35%-dy quraıdy. Bul halyqtyń qarjylyq júktemesin aýyrlatyp, qaryzǵa batýyna ákelýde. Qazir qazaqstandyqtardyń nesıe qaryzy 13 trln teńgeden asty. Buǵan halyqtyń nesıege qumarlyǵy sebep emes, qarjylyq saýattyń tómendigi men nesıelik sharttardyń tıimsizdigi sebep bolyp otyr. Sondyqtan memleket joǵary paıyzdyq mólsherlemelerge shekteý qoıýy tıis”, – dedi Syrymbek Taý.

Ol mıkroqarjy uıymdarynyń paıyzdyq mólsherlemesin 46%-dan 35%-ǵa, al kepildik nesıe mólsherlemesin 35%-dan 25%-ǵa deıin tómendetýdi usyndy.

Sonymen qatar kásipker salyq tólemeıtin kompanıalarǵa nesıe berýdi toqtatýdy da kóterdi. Onyń pikirinshe, bul bıznesti kóleńkeli aınalymnan shyǵarýǵa jáne ekonomıkanyń ashyqtyǵyn qamtamasyz etýge yqpal etedi.