Qazaqstanda ǵylymi jobalardy saraptaý jáne irikteý tártibi qaita qaralyp jatyr. Endi zertteýlerdiń qaitalanýyna jol bermeý jáne biýdjet qarajatynyń tiimdi jumsalýyn qamtamasyz etý úshin ótinimderdi tekserýdiń qosymsha tetikteri engizilgen. Bul týraly Ǵylym jáne joǵary bilim ministri Saiasat Nurbek Quryltaida ótken brifingte málimdedi, dep habarlaidy dalanews.kz.
Ministrdiń aitýynsha, ǵylymi jobalardy baǵalaityn sarapshylar endi avtomattandyrylǵan júie arqyly kezdeisoq irikteý ádisimen tańdalady. Sonymen qatar sarapshylar pýly keńeitilgen. Qazir ministrlik usynylǵan jobalardy Qazaqstanda jáne shetelde júrgizilgen uqsas zertteýlermen salystyratyn algoritmderdi synaqtan ótkizip jatyr. Bul bir taqyryptaǵy zertteýlerdiń qaitalanýyn boldyrmaýǵa múmkindik beredi.
«Endi ár kezeńde ǵylymi ótinimderdi qatań irikteýge arnalǵan qosymsha tetikter qarastyrylǵan», - dedi Saiasat Nurbek.
Sondai-aq ǵylymi jobalarǵa mindetti ekonomikalyq negizdeme talaby engizilgen. Budan bólek, ǵylymi-tehnikalyq tapsyrmalardy tekserýge Ulttyq ǵylym akademiiasy tartylǵan.
Buryn ǵalymdar usynǵan ótinimderdi Ǵylym komiteti qarap, zertteýlerdiń qaitalanýyn teksergennen keiin tiisti keńeske joldaityn. Endi Ulttyq ǵylym akademiiasy qosymsha súzgi retinde qatysady. Osylaisha, jobalar joǵary ǵylymi-tehnikalyq keńestiń qaraýyna shyǵarylǵanǵa deiin birneshe kezeńnen ótedi.
Ministr Ulttyq ǵylymi keńes músheleriniń jaýapkershiligi de kúsheitilgenin aitty. Endi olarǵa ákimshilik jaýapkershilikpen qatar qylmystyq jaýapkershilik te qarastyrylǵan.
Ǵylymi jobalardy irikteýdegi taǵy bir ózgeris jeke sektor men naqty ekonomika ókilderiniń birlesip qarjylandyrýyna qoiylatyn talaptardyń artýymen bailanysty. Saiasat Nurbektiń pikirinshe, biznestiń ǵylymi ázirlemelerge qarajat salýǵa daiyn bolýy olardyń praktikalyq mańyzyn kórsetedi.
Buǵan deiin Joǵary aýditorlyq palata Qazaqstanda ǵylymi jobalardy qarjylandyrý kezinde 51 mlrd teńgeniń qarjylyq zańbuzýshylyǵyn jáne 47 mlrd teńgeniń tiimsiz josparlanyp, paidalanylǵanyn anyqtaǵany habarlanǵan bolatyn.
