Mańǵystaýdaǵy tótenshe jaǵdaidyń alǵashqy táýliginde memlekettik organdar oqiǵa, izdeý-qutqarý jumystary jáne tergeý barysy týraly aqparatty júieli túrde jariialap otyrǵan. Bul týraly saiasattanýshy Liliia Manshina Telegram-daǵy paraqshasynda jazdy, dep habarlaidy dalanews.kz.
Qorǵanys ministrliginiń Kaspiidegi qaiǵyly oqiǵa týraly alǵashqy habarlamasy saǵat 13:57-de jariialanǵan. Keiin jańalyqtar portaldary oqiǵa ornynan foto jáne video jariialap, jaǵdaidy ashyq kórsetti.
Memlekettik organdar alǵashqy habarlamamen shektelmei, izdeý-qutqarý jumystarynyń ár kezeńi týraly aqparat berip otyrǵan. Saiasattanýshynyń pikirinshe, bul jalǵan aqparat, qaýeset pen túrli boljamdar taralýyna jol bermei, aqparattyq bastamany saqtaýǵa múmkindik bergen.
Alǵashqy habarlamadan 16 minýt ótken soń, saǵat 14:13-te Bas prokýratýra qylmystyq is qozǵalǵanyn jáne jedel tergeý toby qurylǵanyn habarlady. Tergeý erekshe baqylaýǵa alynǵany aityldy.
Saǵat 15:11-de Úkimettik komissiia qurylǵany belgili boldy. Komissiia oqiǵa ornyna birden attanǵan.
Saǵat 16:47-de Aqorda qaza tapqan áskeri qyzmetshilerdiń týystaryna Memleket basshysynyń kóńil aitýyn jariialady. Qasym-Jomart Toqaev úkimettik komissiia men memlekettik organdarǵa qaza tapqandardyń otbasylaryna kómektesip, qaiǵyly oqiǵanyń mán-jaiyn anyqtaý úshin sharalar qabyldaýdy tapsyrdy.
Sol kúni Prezident jalpyulttyq aza tutý kúnin jariialady.
Kelesi kúni saǵat 09:57-de Bas prokýratýra júrgizilgen tergeý sharalary, sonyń ishinde saraptamalar men jaýap alýlar týraly aqparat berdi. Nátijesinde alǵashqy kúdiktiler anyqtaldy.
Úsh saǵattan keiin, saǵat 13:28-de Ishki ister ministrligi qaiǵyly oqiǵaǵa jaýapty bes laýazymdy tulǵanyń ustalǵan sáti túsirilgen videony jariialady.
Sarapshy BAQ-ta áskeri qyzmetshilerdiń qazasyna qatysty is boiynsha "Qorǵanys ministrliginiń laýazymdy tulǵalary" ustalǵany týraly birdei taqyryptar taraǵanyna nazar aýdardy. Onyń pikirinshe, bul qoǵamǵa laýazymyna qaramastan, qaiǵyly oqiǵaǵa qatysy bar adamdar jaýapkershilikke tartylatynyn kórsetken.
Budan bólek, BAQ-ta qaiyrymdylyq qarajatyn bólý jónindegi arnaiy komissiiany Qazaqstan Halyq Keńesiniń múshesi Bekmurat Júsipov basqaratyny jazylǵan. Sonymen qatar, memlekettik organdar áskeri qyzmetshilerdiń otbasylaryn tolyq qoldaýǵa mindetteme alǵany aitylǵan.
Keshke Telegram-arnalarda óńir basshylarynyń qaza tapqan áskeri qyzmetshilerdiń otbasylaryna baryp, Memleket basshysynyń jeke kóńil aitý jedelhattaryn tabystaǵan sátteri jariialandy.
Saiasattanýshynyń paiymdaýynsha, habarlamalar ýaqtyly jariialanýy, aqparattyń mazmuny men BAQ-taǵy materialdardyń qarqyny memlekettik organdardyń tótenshe jaǵdai kezinde jedel áreket etip, qoǵamdy oqiǵanyń barysy týraly habardar ete alǵanyn kórsetti.
