Qala ákimi Prezıdenttiń batyl is-qımylynyń arqasynda eldiń kúıreýiniń aldyn alýǵa qoljetkenin atap ótti. Qazaqstan búkil álemge bizdiń elimizdi jáne halqymyzdy kúıretý jáne qurtý múmkin emestigin dáleldedi.
– Biz qazaqstandyqtardyń qıyn kezeńderde uıymshyl bolyp, birtutas judyryq retinde áreket etetinine taǵy da kóz jetkizdik. Almatylyqtarǵa tártipsizdik kezinde kórsetken sabyrlylyq pen batyldyq jáne bizge kórsetken kómekterińiz úshin alǵys aıtamyn! – dedi Baqytjan Saǵyntaev.
Almatynyń tynys-tirshiligin qalpyna keltirý jónindegi qalalyq shtab táýlik boıy jumys isteıdi. Qalanyń barlyq qyzmetteri antıterrorıstik ortalyqpen tyǵyz qarym-qatynasta jumys isteıdi. Barlyq máseleler kelisilgen túrde sheshiledi jáne birtindep qala qalypty jaǵdaıǵa oralady.
Qalanyń barlyq aýdandarynda tazalyq jumystary júrgizilýde. Kóshelerden 200 tonnadan astam qoqys, aýlalardan myń tonnadan astam QTQ shyǵaryldy. Komýnaldyq qyzmetter áskerı qyzmetshiler zalalsyzdandyrǵan aýmaqtarǵa kiredi. Quqyq qorǵaý organdary qalany tazartýdy jalǵastyrýda. Aıta ketsek, bul kúnderi qalanyń tynys-tirshiligin qamtamasyz etý júıesi úzilissiz jumys istedi. Halyqty sýmen jabdyqtaý, káriz, gazben jabdyqtaý, jylý qyzmetterimen qamtamasyz etý shtattyq rejımde júrgiziledi.
Qalanyń azyq-túlik qaýipsizdigi qamtamasyz etildi. 80-ge jýyq sýpermarket, úsh iri azyq-túlik bazary, 70-ke jýyq JQS, 111 dárihana jumys isteı bastady, olardyń úsheýi táýlik boıy jumys isteıdi. Avtogaz baǵasy lıtrine 70 teńgege deıin tómendedi.
– Qabyldanyp jatqan sharalar qala ómirin birtindep qalypqa keltirýge múmkindik berdi. Bizden tek sabyrlyq, shydamdylyq pen túsinistik qajet», - dep Baqytjan Saǵyntaev TJ rejıminiń talaptaryn múltiksiz saqtaý jáne komendanttyq saǵatty buzbaý qajettigin eske saldy.
